(ខេត្តកែប)៖ កិច្ចប្រជុំត្រួតពិនិត្យវឌ្ឍនភាពការអនុវត្តគម្រោង និងពិភាក្សាការរៀបចំគម្រោងថ្មីបន្ថែម របស់រដ្ឋបាលខេត្ត ត្រូវបានរៀបចំឡើងកាលពីថ្ងៃទី២៦ ខែមិថុនា ឆ្នាំ២០២០ ក្រោមអធិបតីភាព លោក សោម ពិសិដ្ឋ អភិបាលនៃគណៈអភិបាលខេត្ត និងជាប្រធានគណៈកម្មការរៀបចំគម្រោងខេត្ត ដោយមានការអញ្ជើញចូលរួមដោយអនុប្រធាន សមាជិកសមាជិកាគណៈកម្មាការរៀបចំគម្រោងខេត្តកែប។
លោក សោម ពិសិដ្ឋ អភិបាលខេត្ត បានលើកឡើងថា ការរៀបចំកិច្ចប្រជុំនេះ ដោយយោងលើសៀវភៅណែនាំស្ដីពីការរៀបចំគម្រោងរាជធានី ខេត្តនិងដើម្បីឲ្យដំណើរការ អនុវត្តគម្រោងខេត្តឆ្នាំ២០២០ អនុវត្តទៅទទួលបានលទ្ធផលល្អ និងមានគុណភាពខ្ពស់ ពិសេសការ រៀបចំគម្រោងថ្មីបន្ថែមទៀតឲ្យត្រូវតាមតម្រូវការអាទិភាពរបស់ប្រជាពលរដ្ឋក្នុងខេត្ត។
ក្នុងកិច្ចប្រជុំពិភាក្សាពិនិត្យបញ្ហាប្រឈម វឌ្ឍនភាពនៃការអនុវត្តគម្រោងរបស់ខេត្តនេះ ក៏ដើម្បីស្វែងរកកត្តារាំងស្ទះផ្សេងៗ ដើម្បីដោះស្រាយឲ្យបានទាន់ពេលវេលា ដោយខណៈនោះ លោកអភិបាលខេត្ត ក៏បានពិនិត្យទៅលើតម្រូវការជាក់ស្តែងដែលមានក្នុងកម្មវិធីវិនិយោគបីឆ្នាំរំកិលខេត្ត ក្នុងការកំណត់គម្រោងថ្មីបន្តទៀត ដូចជាការរៀបចំសណ្តាប់ធ្នាប់ទីសាធារណៈឲ្យបានល្អ គឺត្រូវបំពាក់អំពូល LED នៅលើដងផ្លូវដែលជាគោលដៅសំខាន់បំផុតសម្រាប់បម្រើដល់ប្រជាពលរដ្ឋក្នុងការធ្វើដំណេីរ។
លោកបានក្រើនរំលឹកដល់ សមាជិកគណៈកម្មការរៀបចំគម្រោងខេត្ត មន្ទីរអង្គភាពពាក់ព័ន្ធត្រូវ ពិនិត្យ និងអនុវត្តន៍ នៅតួនាទីភារកិច្ចរបស់ខ្លួន និងយកចិត្តទុកដាក់បន្ថែមទៅលើគម្រោងផ្លូវសាធារណៈ។ ក្រោយពីកិច្ចប្រជុំចប់ លោកអភិបាលខេត្ត បានដឹកនាំក្រុមការងារចុះពិនិត្យទីតាំងគម្រោង តាមផ្លូវស្របមាត់សមុទ្រដើម្បីស្វែងយល់ពីស្ថានភាពជាក់ស្តែង៕ សេង ណារិទ្ធ
