(ខេត្តកែប)៖ ជនសង្ស័យដែលជាមុខសញ្ញាប្រើប្រាស់គ្រឿងញៀនម្នាក់ត្រូវបានកម្លាំងនគរបាលខេត្តកែបឃាត់ខ្លួនរួចកសាងសំុរឿងបញ្ជូនទៅសាលាដំបូងខេត្តកំពតដើម្បីចាត់ការបន្តនៅព្រឹកថ្ងៃទី២៣ ខែមិថុនា ឆ្នាំ២០២០នេះ។
តាមប្រភពពីសមត្ថកិច្ចបានបញ្ជាក់ថា ការឃាត់ខ្លួនជនសង្ស័យនេះ ក្រោមការដឹកនាំ ចង្អុលបង្ហាញពីលោកឧត្តមសេនីយ៍ត្រី សម្បត្តិ សុធារដ្ឋ ស្នងការនគរបាលខេត្តកែប ទើបនៅយប់ថ្ងៃទី២១ ខែមិថុនា ឆ្នាំ២០២០ កម្លាំងការិយាល័យប្រឆាំងគ្រឿងញៀន សហការជាមួយនគរបាលក្រុង និងនគរបាលមូលដ្ឋាន ចុះបង្ក្រាបករណីប្រើប្រាស់គ្រឿងញៀន នៅភូមិកំពង់ត្រឡាច សង្កាត់ព្រៃធំ ក្រុងកែប ហើយសមត្ថកិច្ចក៏បានឃាត់ខ្លួនជនសង្ស័យម្នាក់ខាងលើ ឈ្មោះ សាន សុង ភេទប្រុស អាយុ៣៩ឆ្នាំ មុខរបរ ជាងសំណង់ រស់នៅភូមិ សង្កាត់ខាងលើ និងដកហូតបានវត្ថុតាងរួមមាន៖ ម្សៅក្រាមពណ៌ស៤កញ្ចប់(ធំ១កញ្ចប់,តូច៣កញ្ចប់) ទម្ងន់៥,៨៤ក្រាម ថ្លឹងទាំងថង់ , ម៉ូតូម៉ាកអ៊ែប្លេកចំនួន១គ្រឿង , ទូរស័ព្ទម៉ាកVIVO ចំនួន១គ្រឿង , កន្ត្រៃចំនួន១ដើម , ដែកកេះចំនួន៥ដើម , បារីចំនួន៣កញ្ចប់ និងស៊ីមកាតចំនួន១។
បច្ចុប្បន្នជនសង្ស័យរួមទាំងវត្ថុតាងសមត្ថកិច្ចជំនាញបានកសាងសំណុំរឿងបញ្ជូនទៅសាលាដំបូងខេត្តកំពតចាត់ការតាមផ្លូវច្បាប់៕ សេង ណារិទ្ធ
