(ខេត្តកំពត)៖ នៅព្រឹកថ្ងៃទី១៨ ខែមិថុនា ឆ្នាំ២០២០នេះ លោកឧត្តមសេនីយ៍ទោ ស៊ន សម្បត្តិ នាយករង នាយកដ្ឋានសរុបវគ្គលេខាធិការក្រសួងការពាជាតិ និងជាប្រធានវគ្គបណ្តុះបណ្តាលមហាវិទ្យាល័យយុទ្ធសាស្ត្រជំនាន់ទី១៤ បានដឹកនាំសហការីក្នុងអង្គភាព ព្រមទាំងកម្លាំងសមត្ថកិច្ចចម្រុះក្នុងស្រុកកំពង់ត្រាច ុចុះសួរសុខទុក្ខក្រុមគ្រួសារ លោកវរសេនីយ៍ទោ ង៉ូវ ហេង មេបញ្ជាការផ្នែកសឹករងកំពង់ត្រាច ដែលរងគ្រោះដោយអគ្គីភ័យឆេះផ្ទះកាលពីពេលថ្មីៗនេះ ស្ថិតនៅទីតាំងកើតហេតុ ក្នុងភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។
ក្នុងដំណើរចុះសួរសុខទុក្ខនេះ លោកឧត្តមសេនីយ៍ទោ ស៊ន សម្បត្តិ ក៏សូមចូលរួមនូវការសោកស្តាយជាពន់ពេក ខណៈក្រុមគ្រួសារលោក ង៉ូវ ហេង បានជួបហេតុការណ៍មួយដែលនឹកស្មានមិនដល់ ថែមទាំងបាត់បង់នូវធនធាន សម្ភារៈ និងទ្រព្យសម្បត្តិមួយចំនួនធំនៅក្នុងផ្ទះ ដោយសារអគ្គីភ័យបានលេបត្របាក់ក្នុងមួយប៉ព្រិចភ្នែក។ជាមួយគ្នានេះ ដើម្បីចូលរួមការសោកស្តាយ លោកឧត្តមសេនីយ៍ទោ ស៊ន សម្បត្តិ រួមជាមួយសហការី ក៏បានឧបត្ថម្ភនូវថវិកាមួយចំនួនជូនដល់ក្រុមគ្រួសារលោក ង៉ូវ ហេង ផងដែរ។
ក្នុងឱកាសនោះ លោក ង៉ូវ ហេង ព្រមទាំងក្រុមគ្រួសារទាំងមូលក៏សូមថ្លែងអំណរគុណ លោកឧត្តមសេនីយ៍ទោ ស៊ន សម្បត្តិ និងសហការី ដែលបានឆ្លៀតឱកាសដ៏មានតម្លៃដឹកនាំកម្លាំងចុះមកសួរសុខទុក្ខក្រុមគ្រួសាររបស់លោកដែលកំពុងជួបគ្រោះអាសន្ន។
សូមបញ្ជាក់ថាកាលពីវេលាម៉ោង១០ និង២០នាទីយប់ ថ្ងៃអាទិត្យ ទី១៣ ខែមិថុនា ឆ្នាំ២០២០ លំនៅដ្ឋានស្ថិតជាប់ផ្សារកំពង់ត្រាច ផ្នែកខាងកើត ត្រូវអគ្គីភ័យលេបត្របាក់ ដែលគេសង្ស័យថាផ្តើមឡើងដោយសារទុស្សេចរន្តអគ្គិសនី។ជាមួយនឹងហេតុការណ៍នោះ គេឃើញវត្តមាន លោក អូន ខន អភិបាល នៃគណៈអភិបាលស្រុកកំពង់ត្រាច បានដឹកនាំកម្លាំងចម្រុះនៃកម្លាំងអធិការដ្ឋាននគរបាលស្រុក និងមានការចូលរួមពីកម្លាំងអធិការដ្ឋាននគរបាលស្រុកបន្ទាយមាស និងកម្លាំងនគរបាលមកពីខេត្តកែប បានធ្វើអន្តរាគមន៍យករថយន្តពន្លត់អគ្គីភ័យជួយពន្លត់ភ្លាមៗ ហើយបានបញ្ចប់ជាស្ថាពរនៅវេលាម៉ោង១២យប់ថ្ងៃដដែល។
ចំពោះហេតុការណ៍អគ្គីភ័យឆាបឆេះខាងលើនេះ មិនបង្កឲ្យមានគ្រោះថ្នាក់ និងប៉ះពាល់ដល់អាយុជីវិតមនុស្សសត្វឡើយ ដោយគ្រាន់តែខូចខាតទ្រព្យសម្បត្តិ និងសម្ភារៈអស់មួយចំនួនធំតែប៉ុណ្ណោះ៕ សេង ណារិទ្ធ
