(ខេត្តកែប)៖ យោងតាមប្រភពព័ត៌មានពីសមត្ថកិច្ចនៃស្នងការដ្ឋាននគរបាលខេត្តកែប បានឲ្យដឹងថា កាលពីវេលាម៉ោង១១ព្រឹក ថ្ងៃទី០៩ ខែមិថុនា ឆ្នាំ២០២០ ម្សិលមិញ មានករណីកម្មករសំណង់ម្នាក់បានធ្លាក់ពីលើអគារទើបសង់ថ្មីមានកម្ពស់៤ម៉ែត្រ ស្ថិតចំណុចកំពង់ផែកោះទន្សាយ នៃទឹកដីខេត្តកែប បណ្តាលឲ្យកម្មករសំណង់រូបនោះ រងរបួសយ៉ាងដំណំ ហើយក៏បានស្លាប់បាត់បង់ជីវិត ខណៈមេជាងសំណង់បានយកទៅសង្គ្រោះនៅឯមន្ទីរពេទ្យ។
ប្រភពដដែលបានបញ្ជាក់ទៀតថា កម្មករសំណង់រងគ្រោះ មានឈ្មោះ ឌឿន ភេទប្រុស អាយុប្រហែលជាង៤០ឆ្នាំ មានទីលំនៅភូមិសាស្ត្រឃុំត្រពាំងសាលា ស្រុកបន្ទាយមាស ខេត្តកំពត។
ទាក់ទិននឹងគ្រោះថ្នាក់នេះ ត្រូវបានសមត្ថកិច្ចខាងលើបញ្ជាក់ប្រាប់ថា ករណីធ្លាក់ពីលើអគារសង់ថ្មីដែលមានកម្ពស់៤ម៉ែត្រនេះ មកពីជនរងគ្រោះមានការធ្វេសប្រហែសក្នុងពេលបំពេញការងារ ឬអាចមកពីជនរងគ្រោះងងឹតមុខហើយរអិលធ្លាក់ចុះមកក្រោមបណ្តាលឲ្យខ្លួនប្រាណ និងក្បាលប៉ះទង្គិចជាមួយវត្ថុរឹង មានដែកនិងថ្មបេតុងនៅខាងក្រោម។
បច្ចុប្បន្នកម្មករសំណង់រងគ្រោះ ត្រូវបានអ្នកម៉ៅការសំណង់ដឹកសាកសពឆ្ពោះទៅកាន់លំនៅដ្ឋាន ដើម្បីប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី៕ សេង ណារិទ្ធ
