ភ្នំពេញ ៖ ឯកឧត្តម ឃួង ស្រេង អភិបាលរាជធានីភ្នំពេញ បានជំរុញឲ្យអាជ្ញាធរខណ្ឌ និងសង្កាត់ត្រូវរៀបចំផែនការប្រមូលសំរាម ស្ដារប្រឡាយលូ ស្ថិតក្នុងដែនសមត្ថកិច្ច របស់ខ្លួនគ្រប់គ្រង ឲ្យបានល្អបញ្ជៀសការលិចលង់ និងកកស្ទះសំរាម នៅរដូវស្សានេះ និងចៀសវាងកុំឲ្យប្រជាពលរដ្ឋរិះគន់បន្ដទៀត
អភិបាលរាជធានីភ្នំពេញ បានបញ្ជាក់បែបនេះ នៅក្នុងកិច្ចប្រជុំជាមួយអភិបាលខណ្ឌ សង្កាត់ ស្ដីពីដោះស្រាយបញ្ហាកាយប្រឡាយ លូ ដែលរងផលប៉ះពាល់ ពីជំនន់ទឹកភ្លៀង ក្នុងរាជធានីភ្នំពេញ នាថ្ងៃទី៨ មិថុនាឆ្នាំ២០២០នេះ នៅរាជធានីភ្នំពេញ ។
ឯកឧត្តម ឃួង ស្រេង បានបញ្ជាក់ថា៖ ពេលភ្លៀងប៉ុន្មានមេ នេះ តាមការសង្កេតឃើញ នៅខណ្ឌពោធិ៍សែនជ័យ មានជំនន់ កកស្ទះទឹកភ្លៀងពិតប្រាកដមែន ដោយសារ សំរាមហូរមកកកស្ទះនៅមាត់លូ រឿងនេះអាជ្ញាធរខណ្ឌ សង្កាត់ ឡាយតូចៗ លូតូចៗ នៅតាមភូមិសហគមន៍អាជ្ញាធរខណ្ឌ សង្កាត់ត្រូវតែចុះស្ដារភ្លាម បើខ្លួនអត់មានសមត្ថភាពត្រូវរាយការណ៍មក សាលារាជធានីភ្នំពេញ ។
ឯកឧត្តម បន្ដថា៖ បញ្ហាការស្ដារប្រឡាយ លូ ធំៗ ជាដែនសមត្ថកិច្ច របស់សាលារាជធានីភ្នំពេញ ជាអ្នកគ្រប់គ្រង ដោយឡែកបញ្ហាលូ ប្រឡាយតូចៗជាដែនសមត្ថកិច្ចរបស់ អាជ្ញាធរ ខណ្ឌ និងសង្កាត់ជាអ្នកគ្រប់គ្រង យើងមានលូ ប្រឡាយគ្រប់គ្រាន់ហើយ ហេតុអី នៅពេលភ្លៀងម្ដងៗនៅតែលិចលង់ដដែល ៕
