(ខេត្តកំពត)៖ បង្គាស្រស់ចំនួន១២កេះ ដែលមន្ត្រីជំនាញក្នុងច្រកទ្វារព្រំដែនអន្តរជាតិព្រែកចាក អះអាងថា មានចាក់សារធាតុចាហ៊ួយដើម្បីបង្កើនទម្ងន់ហើយលួចឆ្លងដែនតាមច្រកទ្វារនោះ ត្រូវបានមន្ត្រីគយដឹកនាំដោយ លោក យី ថុល ប្រធានស្នាក់ការគយនិងរដ្ឋាករព្រែកចាក សហការជាមួយសមត្ថកិច្ចចម្រុះប្រចាំច្រកទ្វារ បង្ក្រាបកាលពីយប់មិញ ហើយធ្វើការដុតកម្ទេចចោលនៅព្រឹកថ្ងៃទី០៧ ខែមិថុនា ឆ្នាំ២០២០។
លោក យស សាធ អនុប្រធានស្នាក់ការគយនិងរដ្ឋាករព្រែកចាកបានឱ្យដឹងថា ការបង្ក្រាបបង្គាស្រស់មានចាក់បញ្ចូលចាហ៊ួយនេះ ដឹកនាំផ្ទាល់ដោយលោក យី ថុល ប្រធានស្នាក់ការគយនិងថដ្ឋាករប្រចាំតំបន់ សហការជាមួយកម្លាំងចម្រុះប្រចាំច្រកទ្វារព្រំដែន ដោយប្រតិបត្តិការនេះ កម្លាំងបានឆែកឆេររថយន្តឈ្មួញដែលដឹកទំនិញឆ្លងកាត់ ហើយរកឃើញមានបង្គាចាក់បញ្ចូលជាតិចាហ៊ួយដឹកឆ្លងដែនពីប្រទេសវៀតណាមចូលមកទឹកដីខេត្តកំពត ទើបកម្លាំងសហការបង្ក្រាប កាលពីយប់ថ្ងៃទី០៦ ខែមិថុនា ឆ្នាំ២០២០ វេលាម៉ោង២៣។
លោកបានបញ្ជាក់ថា បង្គាចាក់បញ្ចូលជាតិចាហ៊ួយដែលឈ្មួញនាំចូលដោយខុសច្បាប់នោះចំនួន១២កេះ ស្មើនឹង១៩២គីឡូក្រាម ដោយខណៈនេះត្រូវបានដកហូតយកមករក្សាទុកនៅស្នាក់ការគយនិងរដ្ឋាករព្រែកចាក ហើយប្រមូលបង្គាស្រស់ទាំងអស់នោះយកទៅដុតកម្ទេចចោលនៅព្រឹកថ្ងៃអាទិត្យ ទី០៧ ខែមិថុនា ឆ្នាំ២០២០ នេះ តែម្តង។
គួររំឭកដែរថា ក្នុងអំឡុងពេលថ្មីៗនេះ សមត្ថកិច្ចចម្រុះប្រចាំតំបន់ច្រកទ្វារព្រំដែនអន្តរជាតិព្រែកចាក នៃភូមិសាស្ត្រឃុំឫស្សីស្រុកខាងលិច ស្រុកកំពង់ត្រាច ខេត្តកំពត ធ្លាប់បានបង្ក្រាបបង្គាដែលមានចាក់សារធាតុចាហ៊ួយបែបនេះបានរាប់រយគីឡូក្រាម ហើយធ្វើពិធីដុតកម្ទេចចោលម្តងជាពីរដងរួចមកហើយ ដែលធ្វើឱ្យឈ្មួញដែលជាម្ចាស់ទំនិញខាតបង់ថវិកាជាច្រើនស្ទើយំមិនចេញ។ប៉ុន្តែចំពោះការដឹកជញ្ជូនបង្គាចាក់ចាហ៊ួយឆ្លងដែនតាមច្រកទ្វារព្រំដែនដែលត្រូវជំនាញបង្ក្រាបបានលើកនេះ គេមិនទាន់ដឹងថាម្ចាស់បង្គាត្រូវប្រឈមនឹងច្បាប់ឬយ៉ាងណានោះឡើយ៕
សេង ណារិទ្ធ
