(ខេត្តកែប)៖ នៅព្រឹកថ្ងៃអាទិត្យ ទី០៧ ខែមិថុនា ឆ្នាំ២០២០ លោក សោម ពិសិដ្ឋ អភិបាល នៃគណៈអភិបាលខេត្តកែប លោក ទេព យុទ្ធី សមាជិកព្រឹទ្ធសភា ប្រចាំភូមិភាគ៥ និង លោក អ៉ឹង ឆាយ អភិបាល រងខេត្ត នឹងជាអនុប្រធានទី១ ក្រុមការងារចុះជួយភូមិអំពេង ព្រមទាំង លោក លោកស្រី ប្រធាន អនុប្រធានមន្ទីរ អង្គភាពជុំវិញខេត្ត គណ:អភិបាលស្រុកដំណាក់ចង្អើរ ក្រុមប្រឹក្សាស្រុក ដំណាក់ ចង្អើរ និងអាជ្ញាធរមូលដ្ឋាន បានអញ្ជើញចុះជួបសំណេះសំណាល សួរសុខទុក្ខ និងនាំយកនូវអំណោយចែកជូនដល់បងប្អូនប្រជាពលរដ្ឋចំនួន១៣១គ្រួសារ ស្ថិតនៅភូមិអំពេង ឃុំអង្កោល ស្រុកដំណាក់ចង្អើរ ខេត្តកែប។ ចំពោះអំណោយ ដែលប្រជាពលរដ្ឋទទួលបានក្នុងមួយគ្រួសារៗរួមមាន៖ អង្ករ ២៥គីឡូក្រាម ថវិកា៥ម៉ឺនរៀល និងសំបុត្រកំណើត ០១សន្លឹក។
ថ្លែងទៅកាន់បងប្អូនប្រជាពលរដ្ឋនាឱកាសនោះ លោក សោម ពិសិដ្ឋ អភិបាលនៃគណៈអភិបាលខេត្ត បានជំរុញឲ្យបងប្អូនប្រជាពលរដ្ឋត្រូវតែបន្តរក្សាសុខភាពអនាម័យជាប្រចាំ ដើម្បីចៀងវាងការឆ្លងនៅជំងឺផ្សេងៗ ជាពិសេស ជំងឺកូវីដ-១៩ ព្រោះទាំងប្រទេសជិតខាង និងក្នុងប្រទេសកម្ពុជាយើងនៅតែមានជំងឺកូវីត-១៩នេះនៅឡើយ ។
បន្ថែមពីនេះ លោកអភិបាលខេត្ត ក៏បានជំរុញឲ្យបងប្អូនប្រជាពលរដ្ឋទាំងអស់កុំលេងល្បែងស៉ីសងគ្រប់ប្រភេទ ដោយត្រូវយកពេលវេលាទៅប្រកបមុខរបរផ្សេងៗ ដាំដុះដំណាំរួមផ្សំផ្សេងៗដើម្បីលើកកម្ពស់ជីវភាពប្រចាំថ្ងៃ និងបានជំរុញដល់ប្រជាពលរដ្ឋទាំងអស់ត្រូវសហការជាមួយអាជ្ញាធរមានសមត្ថកិច្ចនៅមូលដ្ឋានក្នុងការផ្តល់ដំណឹងអំពីជនសង្ស័យដែលមានការពាក់ព័ន្ធ បទល្មើសផ្សេងៗ ជាពិសេសការប្រើប្រាស់ និងជួញដូរគ្រឿងញៀនគ្រប់ប្រភេទ ដើម្បីឆ្លើយទៅនឹងគោលនយោបាយភូមិឃុំមានសុវត្តិភាព និងត្រូវចូលរួមគោរពច្បាប់ចរាចរណ៍ទាំងអស់គ្នា។
ក្រៅពីនេះ លោក សោម ពិសិដ្ឋ អភិបាលខេត្ត ក៏បានជំរុញដល់អាជ្ញាធរមូលដ្ឋានទាំងអស់ត្រូវបន្តបម្រើនិងផ្តល់សេវាសាធារណ:ជូនដល់ប្រជាពលរដ្ឋឲ្យបានទាន់ពេលវេលា ប្រកបដោយប្រសិទ្ធភាព៕ សេង ណារិទ្ធ
