(ខេត្តកែប)៖ នៅព្រឹកថ្ងៃទី០៤ ខែមិថុនា ឆ្នាំ២០២០ រដ្ឋបាលខេត្តកែប បានរៀបចំពិធីបួងសួងសុំផ្លាស់ប្តូរទីកន្លែងអាស្រម អ្នកតាកង្ហារដែក ពីទីតាំងចាស់ អតីតផ្ទះទឹម ដុង ក្បែរមាត់ឆ្នេរលេងទឹក មកទីតាំងថ្មីនៅមជ្ឈមណ្ឌលវិបស្សនាធុរៈ ហៅវត្តសមាធិ ជាទីតាំងដែលធំទូលាយ និងមានភាពងាយស្រួលសម្រាប់បងប្អូនប្រជាពលរដ្ឋថ្វាយដង្វាយ និងបួងសួងសុំសេចក្តីសុខ សេចក្តីចម្រើន។
ពិធីបួងសួងសុំផ្លាស់ប្តូរអាស្រមថ្មីនេះ បានអញ្ជើញចូលរួម ដោយ លោក កែន សត្ថា រដ្ឋលេខាធិការ នៃទីស្ដីការគណៈរដ្ឋមន្ត្រី លោក សំ សារីន ប្រធានក្រុមប្រឹក្សាខេត្ត និង លោក សោម ពិសិដ្ឋ អភិបាល នៃគណៈអភិបាលខេត្តកែប លោកឧត្តមសេនីយ៍ វរសេនីយ៍ លោក លោកស្រីប្រធាន អនុប្រធាន មន្ត្រីក្រោមឱវាទ មន្ទីរអង្គភាពជុំវិញខេត្តយ៉ាងច្រើនកុះករ ។
គួរបញ្ជាក់ផងដែរថា អ្នក តា កង្ហារ ដែក គឺ ជា ទី សក្ការ មួយ មានបារមីធំសម្បើម និងខ្លាំងពូកែស័ក្ដិសិទ្ធិបំផុតស្ថិតនៅក្នុងទីប្រជុំខេត្តកែបតាំងពីយូរលង់ សម្រាប់ទីសក្ការៈបូជា និងការបួងសួង បែរបន់ សុំសេចក្តីសុខ សេចក្តីចម្រើន ហើយជានិច្ចកាលក្រុមអ្នក ទេសចរដែលទៅ កម្សាន្ត នៅ ទីនេះតែងតែនាំគ្នាអុចធូប ទៀន និងដាក់ដង្វាយ ដើម្បីសុំសេចក្តីសុខគ្រប់ៗគ្នា ដោយពួកគេមិនអាចមើល រំលង នោះ ឡើយ៕ សេង ណារិទ្ធ
