ព្រៃវែង ៖ ប្រជាពលរដ្ឋបានលើកឡើងថា ទីតាំងល្បែងប្រជល់មាន់ និងអាប៉ោង ស្ថិតនៅក្នុងផ្ទះវីឡាមួយកន្លែងក្នុងភូមិស្វាយសាក់ ឃុំពោធិ៍ទី ស្រុកស៊ីធរកណ្ដាល ខេត្តព្រៃវែង កំពុងបើកលេងយ៉ាងរលូនដោយមិនមានសមត្ថកិច្ចធ្វើការបង្ក្រាបឡើយ។
ភ្ញៀវដែលចូលទៅលេងនៅទីនោះបាននិយាយថា ម្ចាស់សង្វៀនជល់មាន់បាន អះអាងថាគ្មានអ្នកណាហ៊ានចាប់នោះទេ ដោយថា គេបានចំណាយប្រាក់ជាច្រើនសំរាប់បង់ឲ្យថ្នាក់លើ ក៏ដូចជាមន្ត្រីសមត្ថកិច្ចទូទាំងខេត្តព្រៃវែងផងដែរ ដើម្បីបើកការលេងល្បែងទាំងនេះជារៀងរាល់ថ្ងៃបាន ដូច្នេះបងប្អូនជាភ្ញៀវកុំខ្លាចឲ្យសោះ ។
យ៉ាងណាក៏ដោយ ប្រជាពលរដ្ឋក្នុងមូលដ្ឋានសូមសំណូមពរដល់ ឯកឧត្តម ជា សុ មេធី អភិបាលខេត្តព្រៃវែង និងឧត្តមសេនីយ៍ត្រី ព្រុំ សន្ធរ ស្នងការខេត្តព្រៃវែង ;សូមមេត្តាចាត់វិធានការណ៍បង្ក្រាបទៅលើទីតាំងសង្វៀនជល់មាន់និងអាប៉ោង ខាងលើនេះផង សូមកុំបណ្តែតបណ្តោយជាបន្តទៀតអី ដើម្បីភូមិឃុំមានសុវត្ថិភាពទាំង ៩ ចំណុច ដែលប្រមុខរាជរដ្ឋាភិបាល ប្រាប់ឱ្យមន្ត្រីសមត្ថកិច្ចគ្រប់ជាន់ថ្នាក់ត្រូវតែអនុវត្តតាមទូនាទីរៀងខ្លួនដើម្បីការពារសន្តិសុខ សុវត្ថិភាព ជូនប្រជាពលរដ្ឋនៅក្នុងមូលដ្ឋាន៕
