(ខេត្តកំពត)៖ នៅព្រឹកថ្ងៃអង្គារ ទី០២ ខែមិថុនា ឆ្នាំ២០២០ លោក ជាវ តាយ អភិបាលនៃគណៈអភិបាលខេត្តកំពត បានដឹកនាំកិច្ចប្រជុំពិនិត្យពិភាក្សាអំពីការធ្វើបច្ចុប្បន្នភាពសន្តិសុខលម្ហសមុទ្រ ដើម្បីផ្ទៀងផ្ទាត់ចំនួនកោះ ថ្មប៉ប្រះទឹក និងថ្មដុះ ក្នុងភូមិសាស្ត្រខេត្តកំពត។ កិច្ចប្រជុំនេះក៏មានការចូលរួពី លោកអភិបាលរងខេត្ត កងកម្លាំងការពារព្រំដែនសមុទ្រ មន្ទីរអង្គភាពពាក់ព័ន្ធ អភិបាលក្រុង ស្រុក និងមន្ត្រីពាក់ព័ន្ធមួយចំនួនផងដែរ។
តាមរបាយការណ៍ និងបទបង្ហាញរបស់លោក ដាញ់ សារី ប្រធានមន្ទីរដែនដីនគរូបនីយកម្មសំណង់ និងសុរិយោដីខេត្ត បានឲ្យដឹងថា៖ ខេត្តកំពតពិតជាមានកោះចំនួន ០៣ពិតមែន តាមការស្រាវជ្រាវរាប់ចំនួនកោះ ថ្មដុះ និងថ្មប៉ប្រ៉ះទឹក ក្នុងភូមិសាស្ត្រខេត្តកំពត នៃកិច្ចសហការណ៍រវាងក្រុមការងារបច្ចេកទេស របស់គណកម្មាធិការជាតិសន្តិសុខលម្ហសមុទ្រជាមួយអាជ្ញាធរខេត្តកំពត ដែលក្នុងនោះកោះសេះ និងកោះគី ស្ថិតនៅក្នុងភូមិត្រពាំងរពៅ ឃុំព្រែកត្នោត ស្រុកទឹកឈូខេត្តកំពត មានចំងាយ ប្រហែល ២២គីឡូម៉ែត្រ ពីព្រំប្រទល់ឆ្នេរត្រពាំងរពៅ ជាប់ព្រំប្រទល់ខេត្តព្រះសីហនុ និងកោះត្រង៉ោល ស្ថិតនៅក្នុងក្រុងកំពត មានចំងាយប្រហែល ៨គីឡូម៉ែត្រ ពីឆ្នេរសង្កាត់ត្រេីយកោះ។
ក្នុងកិច្ចប្រជុំ លោក ជាវ តាយ អភិបាលនៃគណៈអភិបាលខេត្តកំពត បានស្នេីសុំឲ្យអាជ្ញាធរ និងមន្ទីរអង្គភាពពាក់ព័ន្ធចុះធ្វើការវាស់វែង កំណត់ទីតាំងឲ្យបានច្បាស់លាស់ នៃកោះទាំង៣ខាងលើដើម្បីងាយស្រួលក្នុងការគ្រប់គ្រងថែរក្សា៕ សេង ណារិទ្ធ
