(ខេត្តកែប)៖ ជនសង្ស័យពាក់ព័ន្ធគ្រឿងញៀនម្នាក់ត្រូវកងរាជអាវុធហត្ថក្រុងកែប សហការជាមួយអាវុធហត្ថខេត្តកំពត និងអាវុធហត្ថខេត្តស្វាយរៀង តាមប្រមាញ់រហូតឈានដល់ការឃាត់ខ្លួនបានកាលពីព្រឹកថ្ងៃទី២៧ ខែឧសភា ឆ្នាំ២០២០ វេលាម៉ោង៦និង៣០នាទី ត្រង់ចំណុចភូមិដំណាក់ចង្ធើរ សង្កាត់ព្រៃធំ ក្រុងកែប ខេត្តកែប។
ជនសង្ស័យមាន ឈ្មោះ ឃិន បណ្ឌិត ភេទប្រុស អាយុ៣៣ឆ្នាំ មានទីលំនៅភូមិរាជានុកូល ឃុំស្ទឹងត្រែង ស្រុកស្ទឹងត្រែ ខេត្តស្ទឹងត្រែង ត្រូវបានឃាត់ខ្លួនតាមអំណាចដីកាលេខ១១៦ ចុះថ្ងៃទី០៧ ខែមេសា ឆ្នាំ២០២០ របស់អយ្យការអមសាលាដំបូងខេត្តស្វាយរៀងពាក់ព័ន្ធនឹងបទល្មើស ផលិតដោយខុសច្បាប់នូវសារធាតុញៀន រក្សាទុក ជួញដូរដោយខុសច្បាប់សារធាតុញៀននៅក្រុងបាវិត ខេត្តស្វាយរៀង កាលពីអំឡុងខែធ្នូ ឆ្នាំ២០១៩។
ប្រតិបត្តិការនេះដឹកនាំដោយ លោកវរសេនីយ៍ឯក អ៊ុក រិទ្ធិស័ក្ក មេបញ្ជាការរងកងរាជអាវុធហត្ថ ទទួលបន្ទុកការងារព្រហ្មទណ្ឌ សហការជាមួយកម្លាំងអាវុធហត្ថខេត្តកំពត និងកម្លាំងអាវុធហត្ថខេត្តស្វាយរៀង។
ក្រោយពេលឃាត់ខ្លួន កម្លាំងអាវុធហត្ថបានដកហូតវត្ថុតាងមួយចំនួនរួមមាន៖ ឡេបថប១, ទូរស័ព្ទដៃ២គ្រឿង កាមេរ៉ា១ លិខិតឆ្លងដែន១ច្បាប់ អត្តសញ្ញាណប័ណ្ណ១ច្បាប់ រូបិយប័ណ្ណវត្ថុចិន១៣យ័ន ប្រាក់ខ្មែរ ១០៥,៧០០រៀល ខ្សែដៃ(លោហធាតុក្រហម)១ខ្សែ និងចិញ្ចៀន១វង់(លោហធាតុពណ៌ស)។
បច្ចុប្បន្នជនសង្ស័យរួមនឹងវត្ថុតាង កងរាជអាវុធហត្ថក្រុងកែប បានធ្វើកំណត់ហេតុប្រគល់ជូនអាវុធហត្ថខេត្តស្វាយរៀងដែលជាម្ចាស់សាមីដើម្បីអនុវត្តតាមនីតិវិធី៕ សេង ណារិទ្ធ
