(ខេត្តកំពត)៖ បុរសម្នាក់បានអះអាងថា គាត់ត្រូវរងការចោទប្រកាន់ពីអាជ្ញាធរមូលដ្ឋាន ទាក់ទិននឹងករណីចាក់ដីរំលោភផ្លូវសាធារណៈ ដោយខាងអាជ្ញាធរថែមទាំងបានធ្វើលិខិតកោះហៅគាត់ឲ្យទៅបំភ្លឺពីរលើកផងដែរ។
បុរសដែលត្រូវរងការចោទប្រកាន់ខាងលើមានឈ្មោះ សុប យូសុះ អាយុ៤០ឆ្នាំ មានទីលំនៅភូមិម៉ាក់ប្រាង្គ ឃុំកំពង់គ្រែង ស្រុកទឹកឈូ ខេត្តកំពត គាត់បានរៀបរាប់ថា ករណីដែលអាជ្ញាធរឃុំកំពង់គ្រែងចោទប្រកាន់ថាគាត់ចាក់ដាក់រំលោភយកផ្លូវសាធារណៈនោះគឺមិនពិតទេ យ៉ាងពិតប្រាកដ ព្រោះចំណុចដែលគាត់ចាក់ដីលុបនេះជាដីរបស់គាត់មិនមែនជាផ្លូវសាធារណៈឡើយ។
ប៉ុន្តែគាត់ទទួលស្គាល់ថាចំណុចដីនេះកាលពីមុនមានភ្លឺស្រែតូចមួយទំហំប្រហែលកន្លះម៉ែត្រតែប៉ុណ្ណោះ គឺអត់មានផ្លូវឆ្លងកាត់ឡើយ ។
តែបន្ទាប់ពីម្ចាស់ផ្ទះជាជនបរទេសដែលនៅពីក្រោយដីរបស់គាត់ បានលក់ទៅឲ្យអ្នកផ្សេងទៅ ស្រាប់តែមកជំទាស់តវ៉ាដើម្បីយកដីរបស់គាត់ធ្វើជាផ្លូវចេញចូល ហើយកន្លងមក ក៏មាន ឈ្មោះ ហ្វីន ដាលី ដែលជាអតីតមេភូមិ បានមកសួរចង់ទិញដីត្រង់ចំណុចនេះ សម្រាប់ធ្វើផ្លូវចេញចូលឲ្យម្ចាស់ដីខាងក្រោយ តែត្រូវលោក មីត សារី ជាក្រុមប្រឹក្សាឃុំកំពង់គ្រែងមកបង្អាកដោយនិយាយថា មិនបាច់ទិញទេគឹយកតែម្តង ព្រោះកន្លែងនេះជាផ្លូវសាធារណៈតាំងពីយូរមកហើយ។
ទាក់ទងនឹងរឿងរ៉ាវខាងលើ លោកមីត សារី ក្រុមប្រឹក្សាឃុំកំពង់គ្រែង បានបញ្ជាក់ប្រាប់ឲ្យដឹងនៅព្រឹកថ្ងៃអាទិត្យទី២៤ ខែឧសភា ឆ្នាំ២០២០ថា ចំណុចដែលឈ្មោះ សុប យូសុះចាក់ដីនេះ គឺជាផ្លូវសាធារណៈ ដែលធ្លាប់មានមនុស្សដើរចេញចូល ព្រោះកាលពីជំនាន់មុននៅខាងក្នុងនោះមានរោងម៉ាសុីនអាឈើនៅទីនោះ។ លោកបន្តថា ដោយយោងទៅតាមកំណត់ហេតុចុះថ្ងៃទី០៩ ខែសីហា ឆ្នាំ២០១២ មានប្រជាពលរដ្ឋ២០នាក់ បានផ្តិតមេដៃទទួលស្គាល់ថា ដីនេះពិតជាមានផ្លូវចេញចូលព្រែកសម្រាប់ឲ្យប្រជាពលរដ្ឋចុះទៅប្រើប្រាស់ទឹកព្រែក ដែលមានទំហំ ២,៨ម៉ែត្រ ទើបអាជ្ញាធរឃុំធ្វើលិខិតឲ្យលោក សុប យូសុះកាយអាចម៍ដីដែលគាត់បានចាក់បំពេញនោះវិញជាបន្ទាន់។
ដោយឡែក លោកស្រី ឃន សុម៉ាលី មេឃុំកំពង់គ្រែង បានលើកឡើងថា តាមពិតករណីលោកសុបយូសុះ ចាក់ដីយកផ្លូវសាធារណៈគឺជាកំហុសឆ្គងមួយទៅហើយ ប៉ុន្តែលោក សុប យូសុះ មិនព្រមទទួលកំហុសទេបែរជាចង់តបតជាមួយអាជ្ញាធរឃុំ ថែមទាំងហៅអ្នកកាសែតឲ្យមកចុះផ្សាយទៀត ធ្វើបែបនេះហាក់គ្មានដឹងច្បាប់ទម្លាប់អ្វីបន្តិចសោះ។ ចំពោះរឿងចឹងៗបើអ្នកកាសែតណាជឿលោក សុប យូសុះ ហើយយករឿងបែបនេះទៅផ្សាយប្រយ័ត្នខាតបង់អសារ ឥតប្រយោជន៍ គាត់សូមប្រាប់យកតែបុណ្យទៅចុះ៕ សេង ណារិទ្ធ
