(ខេត្តកែប)៖ នៅព្រឹកថ្ងៃទី១៤ ឧសភា ឆ្នាំ២០២០នេះ លោក កែន សត្ថា អភិបាល នៃគណៈអភិបាលខេត្តកែប អមដំណេីរជាមួយដោយ លោក អ៊ុក ថា អភិបាលរង ខេត្ត លោក លោកស្រី ប្រធានមន្ទីរអង្គភាពពាក់ព័ន្ធ លោកស្រី អភិបាល ក្រុង កែប និងមន្ត្រីពាក់ព័ន្ធមួយចំនួនទៀត បានអញ្ជើញពិនិត្យទីតាំងមួយចំនួននៅតាមបណ្ដោយឆ្នេរលេងទឹក ចំណុច(ស្រី ស) និងទីតាំងកំពុងសាងសង់អាងប្រព្រឹត្តកម្មទឹកកខ្វក់ស្ថិតនៅខាងក្រោយអាស្រមលោកយាយម៉ៅ ស្ថិតនៅភូមិកែប សង្កាត់កែប ក្រុងកែប ខេត្តកែប។
ក្នុងដំណើរចុះត្រួតពិនិត្យនេះ លោក កែន សត្ថា អភិបាលខេត្តកែប បានបញ្ជាក់ឱ្យដឹងថា ដើម្បីកែប្រែសោភ័ណភាពក្នុងទីប្រជុំជនខេត្តកែប ឱ្យកាន់តែមានភាពស្រស់បំព្រង គប្បីយើងទាំងអស់គ្នាចេះសម្អាតបរិស្ថានឱ្យបានស្អាត ពិសេសកត្តាអនាម័យជាចម្បង។
លោកអភិបាលខេត្តបានគូសបញ្ជាក់ផងដែរថា ដើម្បីឆ្លើយតបនឹងតម្រូវការដ៏ចាំបាច់ រដ្ឋបាលខេត្តនឹងបន្តការអនុវត្ត ពិសេសការកែលម្អនៅតាមដងផ្លូវសាធារណៈ មាត់ឆ្នេរលេងទឹក និងសាងសង់អាងប្រព្រឹត្តិកម្មសម្រាប់ចម្រោះទឹកកខ្វក់ ដែលគ្រោងនឹងបំពាក់ឧបករណ៍ដាក់ឱ្យដំណើរការនាចុងឆ្នាំ២០២០ខាងមុខនេះ ដើម្បីបញ្ជៀសការបង្ហូរទឹកកខ្វក់ចូលទឹកសមុទ្រក្នុងតំបន់រមណីយដ្ឋានខេត្តទេសចរណ៍របស់យើង៕ សេង ណារិទ្ធ
