(ខេត្តកំពត)៖ លោក លី សារី សមាជិកព្រឹទ្ធសភា លោក ម៉ាត់ សេត អ្នកតំណាងរាស្ត្រមណ្ឌលកំពត និង លោក សាឡេះ សេន ទីប្រឹក្សាជាន់ខ្ពស់នៃរដ្ឋសភាជាតិកម្ពុជា ព្រមទាំងក្រុមការងារ សមាជិកសម្ពន្ធ័យុវជនមុស្លិមកម្ពុជា កាលពីរសៀលថ្ងៃទី១៣ ខែឧសភា ឆ្នាំ២០២០ បានអញ្ជើញបន្តចុះអប់រំផ្សព្វផ្សាយវិធានការបង្ការទប់ស្កាត់ជំងឺឆ្លងកូវិដ-១៩ និងផ្ដល់ជូនអំណោយ ដល់គ្រួសារប្រជាពលរដ្ឋខ្មែរឥស្លាម ប្រឈមការខ្វះខាតជីវភាពនាឱកាសនៃពិធីស្រាយបួសខែរ៉ាម៉ាឌនសាសនាឥស្លាម នៅភូមិកំពង់សំរោង ឃុំកំពង់សំរោង ស្រុកទឹកឈូ ខេត្តកំពត។
មានប្រសាសន៍សំណេះសំណាល លោក សាឡេះ សេន បានលើកឡើងថា ជំងឺឆ្លងកូវិដ១៩ បើទោះបីកម្ពុជាយើង បច្ចុប្បន្នមានលក្ខណៈ ធូរស្បើយក៏ពិតមែន ប៉ុន្តែជំងឺដ៏កាចសាហាវនេះពុំទាន់មានថ្នាំព្យាបាលឱ្យជាសះស្បើយនៅឡើយ ហើយនៅបណ្ដាប្រទេសមួយចំនួនក្នុងពិភពលោក ក៏ពុំទាន់មានលក្ខណៈធូរស្រាលនៅឡើយដែរ។ដូច្នេះសូមបងប្អូនប្រជាពលរដ្ឋយើង បន្តយកចិត្តទុកដាក់ប្រុងប្រយ័ត្ននិងអនុវត្តតាមវិធានការណែនាំរបស់ក្រសួងសុខាភិបាល ក៏ដូចបទបញ្ជារបស់រាជរដ្ឋាភិបាលឱ្យបានល្អប្រសើរបន្ថែមទៀត។
លោក លី សារី សមាជិកព្រឹទ្ធសភា និងលោក ម៉ាត់ សេត អ្នកតំណាងរាស្ត្រមណ្ឌលកំពត ក៏បានលើកឡើងដែរថា រាជរដ្ឋាភិបាលក្រោមការដឹកនាំរបស់សម្ដេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា តែងបាន អនុវត្តនូវគោលនយោបាយ សុខដុមនីយកម្មសាសនា ដោយបានបិទសិទ្ធិនិងបានបើកជំហសិទ្ធយ៉ាងទូលំទូលាយដល់ប្រជាពលរដ្ឋគ្រប់ជំនឿសាសនានៅកម្ពុជា ក្នុងការគោរពនិងជំនឿសាសនារៀងៗខ្លួន។ ក្នុងនោះដែរសម្រាប់ បងប្អូនប្រជាពលរដ្ឋសាសនឹកខ្មែរឥស្លាម ដែលតែងតែបានគោរពប្រតិបត្តិតាមសាសនារបស់ខ្លួនជារៀងរាល់ឆ្នាំនៃខែរ៉ាម៉ាដន ដើម្បីថ្វាយបង្គំព្រះជាលក្ខណៈប្រមូលផ្ដុំតាមព្រះវិហារសាសនារបស់ខ្លួន។ ប៉ុន្តែសម្រាប់ឆ្នាំនេះ ដោយសារស្ថានភាពជំងឺកូវិដ១៩ បានវាយលុក ឆ្លងរាតត្បាតជាសកលក្នុងពិភពលោក ដូច្នេះដើម្បីសុខភាពនិងអាយុជីវិតរបស់ប្រជាពលរដ្ឋយើង ឆ្នាំនេះត្រូវបានរាជរដ្ឋាភិបាល ក៏ដូចជា គណៈដឹកនាំជាន់ខ្ពស់នៃសាសនាឥស្លាមនៅកម្ពុជា បានហាមឃាត់ ដោយដាក់បទបញ្ជាណែនាំពុំអនុញ្ញាតិឱ្យមានការជួបជុំប្រមូលផ្ដុំ មនុស្សច្រើនក្នុងពិធីសាសនា ឬកម្មវិធីផ្សេងៗឡើយ ដែលការហាមឃាត់នេះ ទៀតសោតជាលក្ខណៈទូទៅ មិនថាតែបងប្អូនកាន់សាសនាឥស្លាមឡើយឬសាសនាអ្វីឡើយ។
លោកក៏បានសំណូមពរ ណែនាំឱ្យប្រជាពលរដ្ឋយើង ត្រូវបន្តប្រុងប្រយ័ត្នយកចិត្តទុកដាក់អនុវត្តតាមវិធានការណែនាំរបស់ក្រសួងសុខាភិបាលឱ្យបានកាន់តែល្អប្រសើរថែមទៀត ដោយប្រកាន់ខ្ជាប់ក្នុងការរស់នៅស្អាត ហូបស្អាត ផឹកស្អាត និងចៀសវាង ការធ្វើដំណើរឆ្ងាយពីផ្ទះបើពុំមានការចាំបាច់ ឬប្រមូលផ្ដុំដែលមានលក្ខណៈមនុស្សច្រើននាំឲ្យប្រឈមនឹងការឆ្លងជំងឺកូវីដ១៩ មកដល់គ្រួសារនិងសហគមន៍របស់យើង។
ក្នុងឱកាសនោះ ក៏មានអំណោយសប្បុរសធម៌ ជាកញ្ចប់អាហារស្រាយបួសខែរ៉ាម៉ាដនរបស់លោកស្រី សេន យ៉ានី និងស្វាមី ជូនដល់ប្រជាពលរដ្ឋចំនួន ២០០គ្រួសារ ក្នុងមួយគ្រួសារទទួលបានអង្ករចំនួន ២៥ គីឡូនិងប្រាក់ចំនួន៤ម៉ឺនរៀល ដែលសរុបថវិកាអស់ចំនួន ២០លាន ៦៥ ម៉ឺនរៀល៕ សេង ណារិទ្ធ
