(ខេត្តកំពត)៖ នៅរសៀលថ្ងៃទី១២ ខែឧសភា ឆ្នាំ ២០២០ រដ្ឋបាលខេត្តកំពត បានបើកកិច្ចប្រជុំរវាងអាជ្ញាធរក្រុង ស្រុក និង ឃុំ សង្កាត់ ព្រមទាំងមន្ទីរ អង្គភាពពាក់ព័ន្ធក្នុងខេត្ត ស្ដីពីការរៀបចំហេដ្ឋារចនាសម្ព័ន្ធ ប្រព័ន្ធរំដោះទឹកចេញក្រុងកំពត និងស្រុកទឹកឈូ ក្រោមអធិបតីភាព លោក ជាវ តាយ អភិបាលនៃគណៈអភិបាលខេត្តកំពត។
មានប្រសាសន៍ ក្នុងកិច្ចប្រជុំ លោក ជាវ តាយអភិបាលខេត្ត បានលើកឡើងថា នៅចំពោះមុខនេះ រដ្ឋបាលខេត្តកំពតមានក្ដីបារម្ភ ពីបញ្ហាប្រព័ន្ធរំដោះទឹកចេញក្រុងកំពត និងឃុំមួយចំនួននៃស្រុកទឹកឈូ ដែលជាប់ក្រុងកំពត ដែលបច្ចុប្បន្ននេះបង្កឡើងដោយភាពអវិជ្ជមានមួយចំនួន និងការខ្វះខាតប្រព័ន្ធរំដោះទឹកបណ្ដាលធ្វើឱ្យប្រឈមនៃការបិទផ្លូវទឹក រំដោះចេញពីក្រុងទៅទម្លាក់តាមប្រព័ន្ធបង្ហូរទឹកដែលមានស្រាប់ ។
ផ្ដើមចេញពីក្ដីបារម្ភនេះ លោក ជាវ តាយ អភិបាលខេត្ត បានចាត់ទុកកិច្ចប្រជុំពេលនេះ គឺពិតជាសំខាន់ សម្រាប់ផ្ដល់លទ្ធភាព ឱ្យគ្រប់មន្ទីរអង្គភាពជំនាញ និងអាជ្ញាធរមូលដ្ឋានពាក់ព័ន្ធ ក្នុងគណៈកម្មការ ចូលរួមពិនិត្យពិភាក្សា រកចំណុចដំណោះស្រាយល្អៗ ក្នុងគោលដៅ ដើម្បីទប់ស្កាត់ភាពអានាធិបតេយ្យ និងធ្វើការអភិវឌ្ឍបន្ថែមនូវហេដ្ឋារចនាសម្ព័ន្ធប្រព័ន្ធលូទឹក ក្នុងភូមិសាស្ត្រនៃក្រុងកំពត និងបណ្ដាឃុំមួយចំនួនទៀតនៃស្រុកទឹកឈូ ជាប់ក្រុងកំពត ឱ្យមានលក្ខណៈល្អប្រសើរ ពិសេស ចៀសផុតបាន នូវការលិចលង់ ឬដក់ទឹកក្នុងក្រុងកំពតបន្តទៀត។
ក្នុងឱកាសនោះ លោកអភិបាលខេត្តក៏បាន ស្នើដល់អាជ្ញាធរ មូលដ្ឋានក្រុង ស្រុក ឃុំ សង្កាត់ មន្ទីរ អង្គភាព នឹងរាល់អ្នកពាក់ព័ន្ធទាំងអស់ នៅចំពោះមុខនេះ ត្រូវតែចូលរួមសហការអនុវត្តនូវតួនាទីភារកិច្ចរៀងខ្លួនឱ្យបានល្អ ដោយរួមគ្នាគិត រួមគ្នាធ្វើ និងរួមគ្នាដោះស្រាយក្នុងស្មារតីទទួលខុសត្រូវខ្ពស់ ដើម្បីធ្វើយ៉ាងណាឱ្យការអនុវត្តនៅចំពោះមុខនៃការរៀបចំហេដ្ឋារចនាសម្ព័ន្ធ ប្រព័ន្ធរំដោះទឹកចេញពីក្រុងកំពត និងស្រុកទឹកឈូ ឱ្យមានប្រសិទ្ធភាពនិងប្រកបដោយនិរន្តរភាព៕ សេង ណារិទ្ធ
