(ខេត្តកំពត)៖ អំណោយសប្បុរសធម៌ជាគ្រឿងឧបភោគ បរិភោគ រួមមានអង្ករចំនូន១៩តោន មី១៩០កេស ទឹកត្រី១៩០យួ ទឹកស៊ីអ៉ីវ១៩០យួ អំបិល១៩០បញ្ចប់ ទឹកសុទ្ធ១៩០កេស រួមនិងថវិកា៥០០០ដុល្លា និង ២២លានរៀល ជារបស់លោកស្រីឈុំ ផល្លី សប្បុរសជន ត្រូវបាន ធ្វើពិធីប្រគល់ ជូនដល់ថ្នាក់ដឹកនាំក្រុមការងារគណបក្សខេត្ត និងរដ្ឋបាលស្រុក មន្ទីរមួយចំនួន ក្នុងខេត្តកំពត ដើម្បីជាគោលដៅត្រៀមបម្រុងយកទៅបម្រើ ដល់សកម្មភាពមនុស្សធម៌ ជួយដល់គ្រួសារប្រជាពលរដ្ឋងាយរងគ្រោះ និងមានជីវភាពខ្វះខាត នៅក្នុងមូលដ្ឋាននៃខេត្តកំពត។
ពិធីនេះធ្វើឡើងនៅស្នាក់ការគណបក្សប្រជាជនកម្ពុជាខេត្តកំព នារសៀលថ្ងៃទី១១
ខែឧសភា ឆ្នាំ២០២០ ក្រោមវត្តមាន លោក ជាវ តាយ ប្រធានគណបក្សប្រជាជនខេត្ត និងជាអភិបាលខេត្ត លោកជឹង ផល្លា អនុប្រធានគណបក្សប្រជាជនខេត្តនិងជាប្រធានក្រុមប្រឹក្សាខេត្ត។
លោកស្រីឈុំ ផល្លី សប្បុរសជនម្ចាស់អំណោយបានសំដែង ក្ដីរីករាយ ប្រកបដោយទឹកចិត្តសប្បុរសធម៌ក្នុងការចូលរួមបរិច្ចាគធនធានផ្ទាល់ខ្លួន ដើម្បីរួមចំណែកការងារមនុស្សធម៌សម្រាលការលំបាកជាមួយថ្នាក់ដឹកនាំគណបក្សនិងរដ្ឋបាលគ្រប់ថ្នាក់នៃខេត្តកំពត សម្រាប់យកទៅជួយដោះស្រាយជូនប្រជាពលរដ្ឋងាយរងគ្រោះនិងរងគ្រោះដោយគ្រោះមហន្តរាយផ្សេងៗ និងគ្រួសារមានជីវភាពខ្វះខាតនៅក្នុងមូលដ្ឋាននៃខេត្តកំពត។ពិសេសក្នុងដំណាក់កាលស្ថានភាព ត្រៀមបង្ការ ប្រយុទ្ធទប់ស្កាត់ជំងឺឆ្លងកូវីដ១៩ ដែលជាជំងឺឆ្លងកាចសាហាវ ហើយបញ្ហានេះជាបន្ទុកធ្ងន់ធ្ងរលំបាករបស់រាជរដ្ឋាភិបាលក៏ដូចពិភពលោកទាំងមូលកំពុងរួមគ្នាដោះស្រាយ។
លោក ជាវ តាយ ប្រធានគណបក្សប្រជាជនខេត្ត បានសំដែងការកោតសរសើរ និងថ្លែងអំណរគុណដល់សប្បុរសជន គឺលោកស្រីឈុំ ផល្លី រួមនឹងក្រុមគ្រួសារ ដែលបានបរិច្ចាគធនធានផ្ទាល់ខ្លួន ក្នុងស្ថានភាពពេលនេះ ដែលថ្នាក់ដឹកនាំខេត្តកំពតបាននិងកំពុងត្រូវការ សម្រាប់យកទៅផ្ដល់ជូនដល់ប្រជាពលរដ្ឋ ជួបបញ្ហាប្រឈមងាយរងគ្រោះនិងខ្វះខាតជីវភាព នៅមូលដ្ឋាននានាក្នុងខេត្តកំពត ដែលសព្វថ្ងៃនេះថ្នាក់ដឹកនាំខេត្តក៏ដូចរដ្ឋបាលខេត្ត បាននិងកំពុងមមារញឹកចុះជួយដោះស្រាយនិងចែករំលែកសម្រាលទុក្ខលំបាកការខ្វះខាតជូនដល់ប្រជាពលរដ្ឋក្នុងខេត្តជាបន្តបន្ទាប់។
លោក ជាវ តាយ ក៏បានចាត់ទុកអំណោយពេលនេះគឺពិតជាសំខាន់ ដែលបានរួមចំណែកដល់សកម្មភាពមនុស្សធម៌ជាមួយថ្នាក់ដឹកនាំខេត្ត ក៏ដូចជារដ្ឋបាលខេត្តនិងរាជរដ្ឋាភិបាល ដែល កំពុងជាតម្រូវការ ចាំបាច់ដើម្បីយកទៅដោះស្រាយជូនប្រជាពលរដ្ឋក្នុងមូលដ្ឋាន។ពិសេសក្នុងស្ថានការណ៍ប្រយុទ្ធប្រឆាំងជំងឺឆ្លងកូវីដ១៩ ដែលជាជំងឺឆ្លងសកល ពិភពលោក ក៏ដូចរាជរដ្ឋាភិបាលកម្ពុជាយើងបាននឹងកំពុងយកចិត្តទុកដាក់ដោះស្រាយនូវការលំបាកនេះ៕ សេង ណារិទ្ធ
