(ខេត្តកំពត)៖ ប្រធានមន្ទីរកសិកម្ម និងនាយខណ្ឌរដ្ឋបាលជលផលខេត្តកំពត បានលើកឡើងថា បើទោះជាប្រទេសកម្ពុជាកំពុងទទួលរងឥទ្ធិពលនៃវិបត្តិកូវីដ១៩ក៏ពិតមែន ប៉ុន្តែមន្ត្រីជំនាញនៅតែបន្តសកម្មភាពចុះជំរុញដល់ប្រជាពលរដ្ឋ ឱ្យអភិវឌ្ឍន៍វារីវប្បកម្ម ទាំងទឹកសាប និងទឹកប្រៃ ដើម្បីធានាដល់ការផ្គត់ផ្គង់តម្រូវការទីផ្សារ។ ប៉ុន្តែមួយខែចុងក្រោយនេះនេះ ត្រីក្នុងបែ និងស្រះរបស់ពលរដ្ឋត្រូវនៅសល់ច្រើន ដោយសារគ្មានទីផ្សារល្អ។
នៅក្នុងដំណើរចុះត្រួតពិនិត្យការចិញ្ចឹមត្រីក្នុងបែតាមដៃព្រែក និងមាត់សមុទ្រ ក្នុងភូមិសាស្ត្រ ឃុំព្រែកត្នោត ស្រុកទឹកឈូ ខេត្តកំពត កាលពីថ្ងៃទី ០៧ ខែឧសភា ប្រធានមន្ទីរកសិកម្ម រុក្ខាប្រមាញ់ និងនេសាទ លោកចាន់ រិទ្ធិ បានប្រាប់ឱ្យដឹងថា នៅក្នុងអំឡុងពេលដែលប្រទេសកម្ពុជាទទួលរងឥទ្ធិពលជំងឺកូវីដ១៩ មន្ទីរកសិកម្ម ដោយមានការណែនាំពីថ្នាក់ដឹកនាំក្រសួង និងរដ្ឋបាលខេត្តកំពត បានបង្កើនការងារចុះជំរុញលើកទឹកចិត្តប្រជាពលរដ្ឋឱ្យអនុវត្តវិធានការអនាម័យ ការការពារខ្លួនកុំឱ្យឆ្លងជំងឺកូវីដ-១៩ ពិសេសបានជំរុញពលរដ្ឋឱ្យបន្តការយកចិត្តទុកដាក់បង្កបង្កើនផល ការងារដាំដុះ បន្លែបង្ការ ដំណាំហូបផ្លែផ្សេងៗ ពិសេសការចិញ្ចឹមសត្វគោ ក្របី ជ្រូក មាន់ទា និងចិញ្ចឹមត្រីជាដើម ដើម្បីបំពេញតម្រូវការទីផ្សារក្នុងស្រុក។
លោកប្រធានមន្ទីរបានបញ្ជាក់ថា សម្រាប់ទិន្នផលកសិកម្ម ស្បៀងអាហារត្រីសាច់ នៅក្នុងខេត្តកំពតមិនមានការធ្លាក់ចុះទេ ។ ប៉ុន្តែទិន្នផលមួយចំនួនគ្មានទីផ្សារ ឬតម្លៃធ្លាក់ចុះ ដូចជាស្រូវ ស្វាយ និងផលនេសាទផងដែរ។
ដោយឡែកនាយខណ្ឌរដ្ឋបាលជលផលខេត្តកំពត លោក ស សុរិន បានប្រាប់អ្នកសារព័ត៌មានឱ្យដឹងដែរថា នៅក្នុងអំឡុងពេល ប្រយុទ្ធប្រឆាំងនឹងជំងឺកូវីដ១៩នេះ ប្រជានេសាទនៅតែបន្តការងារនេសាទ ហើយទិន្នផលក៏បានច្រើនដូចសព្វមួយដង ចំណែកពលរដ្ឋដែលចិញ្ចឹមត្រីតាមបែ និងស្រះ ក៏ទទួលបានទិន្នផលល្អដែរ ប៉ុន្តែអ្វីជាបញ្ហាគឺតម្លៃ និងទីផ្សារលក់ផលនេសាទ។
សូមជម្រាបផងដែរថា ខណៈដែលស្ថានភាពជំងឺកូវីដ១៩ នៅកម្ពុជាប្រសើរបន្តិចឡើងវិញ ភ្ញៀវទេសចរ និងភោជនីយដ្ឋានធំ ចាប់ផ្តើមដំណើរការឡើងវិញបណ្តើរផងនោះ មន្ត្រីជំនាញរំពឹងថាមិនយូរទេ ទីផ្សារកសិផល ពិសេសត្រីសាច់ នឹងមានទីផ្សារផ្សារល្អ ឡើងវិញក្នុងពលឆាប់ៗខាងមុខ។ អំឡុងពេលនេះមន្ត្រីជំនាញក៏បានជំរុញដល់ពលរដ្ឋសូមកុំបោះបង់ការងារចិញ្ចឹមត្រី និងផ្អាករបរនេសាទរបស់ខ្លួនឱ្យសោះ៕ សេង ណារិទ្ធ
