(ខេត្តកំពត)៖ ប្រជាពលរដ្ឋក្នុងភូមិដំណាក់ក្រឡាញ់ខាងកើត ឃុំភ្នំប្រាសាទ ស្រុកកំពង់ត្រាច ខេត្តកំពត បាននិងកំពុងមានប្រតិកម្មយ៉ាងពុះកញ្ជ្រោល ដោយសារមានគេចាក់លុបនិងធ្វើរបង យកដីសាធារណៈរបស់រដ្ឋ ស្ថិតក្នុងភូមិសាស្ត្រខាងលើ បំណងយកធ្វើជាកម្មសិទ្ធិ។
ប្រតិកម្មនេះបានកើតឡើងនៅព្រឹកថ្ងៃទី០៩ ខែឧសភា ឆ្នាំ២០២០ ត្រង់ចំណុចខ្លោងទ្វារវត្តអង្គដូនកែវ ជាប់គល់ស្ពានធំផ្នែកខាងលិច ស្ថិតក្នុងភូមិដំណាក់ក្រឡាញ់ខាងកើត ឃុំភ្នំប្រាសាទ ស្រុកកំពង់ត្រាច ខេត្តកំពត។
តាមការបានអះអាងពីប្រជាពលរដ្ឋ ឈ្មោះ ហ៊ុន ចន្តា រស់នៅក្នុងភូមិសាស្ត្រខាងលើ បានរៀបរាប់ថា ចំណុចដីដែលគេចាក់លុបហើយធ្វើរបងនេះជាដីបឹងធម្មជាតិរបស់រដ្ឋ ដោយកន្លងអាជ្ញាធរមូលដ្ឋានក៏បានធ្វើការហាមឃាត់មិនឱ្យចាក់លុបយកដែរ ប៉ុន្តែគេនៅតែចាក់ដីបន្តរហូតហ៊ុមព័ទ្ធរបងបានសម្រេចដដែល។ ពលរដ្ឋខាងលើបានបញ្ជាក់ទៀតថា ចំណុចដែលគេចាក់រំលោភយកនេះមិនមែនជាដីវត្តនោះទេគឺជាដីសាធារណៈរបស់រដ្ឋសុទ្ធសាធ តែពេលនេះត្រូវគេចាក់ដីលុបហើយធ្វើរបងយកដោយគ្មានញញើតច្បាប់។
ជុំវិញនឹងប្រតិកម្មខាងលើ លោក ជួន សុភា អភិបាលរងស្រុកកំពង់ត្រាច បានប្រាប់អ្នកសារព័ត៌មានថា ក្នុងនាមជាអាជ្ញាធរ លោកនឹងរកដំណោះស្រាយដោយសន្តិវិធី ពោលគឺដោះស្រាយតាមគោលការណ៍ឈ្នះ ឈ្នះ ដោយមុនដំបូងយើងនឹងឱ្យជំនាញវាស់វែងកំណត់ព្រំដីឱ្យបានជាក់លាក់ជាមុនសិនទើបរកដំណោះស្រាយបានដោយសន្តិវិធី។
លោកអភិបាលរងស្រុកបានបន្ថែមថា ដំណោះស្រាយបែបនេះ ពុំមានការលំបាកទេព្រោះចំណុចនេះក៏មានប័ណ្ណកម្មសិទ្ធិស្របច្បាប់ដែរ ម្លោះហើយយើងត្រូវវាស់វែងកំណត់ដីកម្មសិទ្ធិឱ្យបានច្បាស់លាស់ជាមុនសិន ដោយនៅសល់ប៉ុន្មានគឺជាដីរបស់រដ្ឋហើយ។
ជាមួយនេះ លោកអភិបាលរងស្រុក ក៏បានលើកឡើងដោយសន្យាថានឹងរកដំណោះស្រាយជូនប្រជាពលរដ្ឋដោយយុត្តិធម៌គ្មានលំអៀង ប្រសិនជាការវាស់វែងឃើញថា មានករណីកេងរំលោភចូលក្នុងដីបឹងសាធារណៈរបស់រដ្ឋមែននោះ លោកនឹងឱ្យដកបង្គោលរបងចេញវិញដោយគ្មានលក្ខខណ្ឌ៕ សេង ណារិទ្ធ
