(ខេត្តកែប)៖ នៅថ្ងៃទី២៨ ខែមេសា ឆ្នាំ២០២០ លោក អុឹង ឆាយ អភិបាលរងខេត្ត និងជាអនុប្រធានក្រុមការងារកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលខេត្ត បានដឹកនាំកិច្ចប្រជុំក្រុមការងារ ដើម្បីប្រមូលព័ត៌មាន ធាតុចូល ធ្វើជាមូលដ្ឋាន សម្រាប់កសាងកម្មវិធីវិនិយោគបីឆ្នាំរំកិលខេត្តក្នុងការរៀបចំផែនការយុទ្ធសាស្ត្រថវិកាខេត្ត។
លោក គង់ សាវ៉ាត ប្រធានមន្ទីរផែនការខេត្ត និងជាសមាជិកអចិន្ត្រៃយ៍ បានបញ្ជាក់ថា កិច្ចប្រជុំនេះ មានគោលបំណង ដើម្បីប្រមូលតម្រូវការអភិវឌ្ឍន៍នានារបស់ខេត្ត ដើម្បីធ្វើជាធាតុចូលក្នុងការរៀបចំផែនការយុទ្ឋសាស្ត្រថវិកាខេត្ត គម្រោងថវិកាប្រចាំឆ្នាំខេត្ត និងកម្មវិធីវិនិយោគបីឆ្នាំរំកិលខេត្ត។
លោកប្រធានមន្ទីរ ក៏បានបន្ថែមទៀតថា ការកសាងកម្មវិធីវិនិយោគបីឆ្នាំរំកិលខេត្ត ជាការធ្វើឱ្យខ្លឹមសារនៃផែនការអភិវឌ្ឍន៍ខេត្តទៅជាសកម្មភាព ឬសេវាជាក់ស្ដែង ដោយមានភ្ជាប់នូវចំណាយមូលនិធិសំដៅលើកកម្ពស់ការផ្ដល់សេវាសាធារណៈ និងកិច្ចអភិវឌ្ឍសម្រាប់រយៈពេលបីឆ្នាំ និងធ្វើបច្ចុប្បន្នភាពជារៀងរាល់ឆ្នាំ។
លោកបានបន្តថា កម្មវិធីវិនិយោគបីឆ្នាំរំកិលខេត្ត ឆ្លុះបញ្ចាំងពីគម្រោង ឬសេវាជាអាទិភាព និងតម្លៃតាមបណ្ដាឆ្នាំនីមួយៗក្នុងរយៈពេលបីឆ្នាំ ស្របនឹងក្របខ័ណ្ឌចំណាយរយៈពេលមធ្យមរបស់រដ្ឋបាលខេត្ត។ ពាក្យថា “បីឆ្នាំរំកិល” មានន័យថា កម្មវិធីវិនិយោគត្រូវរៀបចំឡើងសម្រាប់រយៈពេលបីឆ្នាំ និងធ្វើបច្ចុប្បន្នភាពជារៀងរាល់ឆ្នាំ។ ការរៀបចំបែបនេះ នាំមកនូវភាពងាយស្រួលក្នុងការបង្ហាញពីអ្វីដែលបម្រុងនឹងអនុវត្ដនៅឆ្នាំខាងមុខ។
ក្នុងកិច្ចប្រជុំក្រុមការងារនេះ លោក ភោគ សុខេន អនុប្រធានមន្ទីរផែនការខេត្ត បាធ្វើបទបង្ហាញពីប្រតិទិនការងារសម្រាប់ដំណើរការកសាងកម្មវិធីវិនិយោគបីឆ្នាំរំកិល ដោយអនុវត្តតាមសកម្មភាព មានក្នុងសេចក្តីណែនាំបច្ចេកទេសកំណត់ បង្ហាញពីក្របខណ្ឌអភិវឌ្ឍន៍ខេត្តរយៈពេលប្រាំឆ្នាំ ព្រមទាំងបានណែនាំអំពីវិធីសាស្ត្ររៀបចំធាតុចូលអំពីការវិភាគស្ថានភាព និងតម្រូវការអភិវឌ្ឍន៍(ទម្រង់១) ដោយមានបញ្ជាក់ពី ចំណុចខ្លាំង ចំណុចខ្សោយ បញ្ហាប្រឈម បញ្ហាអាទិភាពសំខាន់ៗត្រូវដោះស្រាយចំពោះមុខ។
ចុងបញ្ចប់ នៃកិច្ចប្រជុំ លោក អ៊ឹង ឆាយ អភិបាលរងខេត្ត និងជាប្រធានអង្គប្រជុំ បានសង្កត់ធ្ងន់ថា កិច្ចការបន្ទាប់ លោក លោកស្រីប្រធានមន្ទីរអង្គភាពជុំវិញខេត្ត អភិបាលក្រុង ស្រុក អង្គការសង្គមស៊ីវិល ត្រូវតែរៀបចំធាតុចូលអំពីការវិភាគស្ថានភាព និងតម្រូវការអភិវឌ្ឍន៍(ទម្រង់១) និងផ្ញើមកក្រុមការងារកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលខេត្តឱ្យបានទាន់ពេលវេលាដែលបានកំណត់៕
សេង ណារិទ្ធ
