(ខេត្តកែប )៖ នៅព្រឹកថ្ងៃសុក្រ ៣ កើត ខែពិសាខ ឆ្នាំ ជូត ទោស័ក ព.ស២៥៦៣ ត្រូវនឹងថ្ងៃទី ២៤ ខែមេសា ឆ្នាំ ២០២០ នេះ លោក កែន សត្ថា អភិបាល នៃគណៈអភិបាលខេត្ត បានអញ្ជើញជាអធិបតី ដ៏ខ្ពង់ខ្ពស់ ក្នុងកិច្ចប្រជុំគណ:អភិបាលខេត្តបើកទូលាយ ដើម្បីឆ្លងសេចក្ដីព្រាងរបាយការណ៍ ប្រចាំត្រីមាសទី១ ឆ្នាំ ២០២០ និងលើកទិសដៅអនុវត្តការងារត្រីមាសទី២ រួមទាំងការងារផ្សេងៗមួយចំនួនទៀត របស់រដ្ឋបាលខេត្ត។
មានប្រសាសន៍ក្នុងកិច្ចប្រជុំនេះ លោក កែន សត្ថា បានលើកឡើងដោយយកគោលការណ៍សំខាន់ៗមួយចំនួនដើម្បីជម្រាបជូនអង្គប្រជុំ ពិសេសវិធានការដ៏ចាំបាច់ក្នុងយុទ្ធនាការបង្ការ ទប់ស្កាត់ការរីករាលដាលជំងឺកូវីដ ១៩ ដែលជាជំងឺដ៏កាចសាហាវមួយគួរឱ្យបារម្ភ។
លោកអភិបាលខេត្តបានបញ្ជាក់ផងដែរថា ទោះបីយ៉ាងណាក៏ដោយ រដ្ឋបាលដែនដីនៅតែដំណើរការភារកិច្ចតាមមុខងារតួនាទីរបស់ខ្លួន ក្នុងនោះអង្គភាពពាក់ព័ន្ធមួយចំនួន ពិសេសផ្នែកសុខាភិបាលបានខិតខំអនុវត្តការងារដូចជាការផ្សព្វផ្សាយស្តីពីការឆ្លងរីករាលដាលជំងឺកូវីដ ១៩ ដោយអប់រំណែនាំឱ្យពលរដ្ឋត្រូវចេះរក្សាអនាម័យ ហូបស្អាត ផឹកស្អាត រស់នៅស្អាត ដោយបានដាក់ចេញនូវវិធានការចំនួនបីចំណុចរួមមាន៖ ទី១-ទប់ស្កាត់កុំឱ្យមានការចម្លង និងកុំឱ្យមានចរាចរពលរដ្ឋពីខាងក្រៅប្រទេសចូលមកក្នុងប្រទេសបន្តទៀត,ទី២-ទប់ស្កាត់កុំឱ្យមានអ្នកឆ្លងហើយ មកចម្លងទៅសហគមន៍ ,ទី៣-ខិតខំព្យាបាលអ្នកផ្ទុកមេរោគកូវីដ ១៩ ទាំងអស់ឱ្យបានឆាប់ជាសះស្បើយ៕ សេង ណារិទ្ធ
