(ខេត្តកែប)៖ នៅព្រឹកថ្ងៃទី១៥ ខែមេសា ឆ្នាំ២០២០ រដ្ឋបាលខេត្តកែប បានផ្សព្វផ្សាយសារាចរណែនាំ ស្តីពីការធ្វើវិចារណកម្ម និងការពង្រឹងប្រសិទ្ធភាពចំណាយលើកទី២ សម្រាប់អនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២០ ក្រោមអធិបតីភាព លោក អ៊ុក ថា អភិបាលរងខេត្តកែប និង លោក កែវ ហុង ប្រធានមន្ទីរសេដ្ឋកិច្ច និងហិរញ្ញវត្ថុខេត្តកែប។
លោក អ៊ុក ថា អភិបាលរងខេត្ត បានគូសបញ្ជាក់ថា ក្នុងបរិការណ៍ដែលសេដ្ឋកិច្ចសកល និងស្ថានភាពម៉ាក្រូសេដ្ឋកិច្ចកំពុងវិវត្តឆាប់រហ័ស និងចល័តយ៉ាងលឿនពិបាកប៉ាន់ប្រមាណឱ្យបានច្បាស់លាស់ ដោយសារផលប៉ះពាល់ធ្ងន់ធ្ងរនៃការរីករាលដាលជំងឺកូវីដ ១៩ រាជរដ្ឋាភិបាលបានធ្វើការវាយតម្លៃឡើងវិញអំពីផលប៉ះពាល់នៃការរីករាលដាលជំងឺកូវីដ ១៩ មកលើក្របខណ្ឌច្បាប់ ថវិកាជាតិពេញ១ឆ្នាំ ២០២០ និងបានសម្រេចបង្វែរទិសនៃការគ្រប់គ្រងហិរញ្ញវត្ថុសាធារណៈ ពី”ថវិកាវិត្ថារកម្ម” (stimulus budget) ដើម្បីលើកកម្ពស់កំណើន ទៅជា “ថវិកាតបៈកម្ម ឬរឹតបន្តឹងចំណាយ” (austerity budget) កម្រិតខ្ពស់មួយ ដើម្បីបង្វែរថវិកាឆ្ពោះទៅដោះស្រាយការងារអាទិភាពចំពោះមុខចំនួន៤ រួមមាន៖ (១)-ប្រយុទ្ធប្រឆាំងទៅនឹងជំងឺកូវីដ-១៩ ,(២)-រក្សាលំនឹងជីវភាពប្រជាជនក្នុងកម្រិតអប្បបរមាមួយ (មិនឱ្យអត់បាយ) ជាពិសេសសម្រាប់ជនក្រីក្រ និងអ្នកបាត់បង់ការងារ,(៣)-ខិតខំជួយឱ្យអស់លទ្ធភាពដើម្បីធុរកិច្ច និងអាជីវកម្មអាចរស់បាន និងរក្សាការងារ ពិសេស រក្សា និងជំរុញ សកម្មភាពសេដ្ឋកិច្ចក្នុងស្រុក និងទី(៤)-រក្សាឱ្យបាននូវសន្តិសុខ សណ្តាប់ធ្នាប់សាធារណៈ និងស្ថិរភាពសង្គម។
ក្នុងន័យនេះ បន្ថែមលើការធ្វើវិចារណកម្ម និងការពង្រឹងប្រសិទ្ធភាពលើការចំណាយលើកទី១ តាមរយៈការអនុវត្តសារាចរណែនាំលេខ ០០១ សហវ-អថ ចុះថ្ងៃទី ០៦ ខែមីនា ឆ្នាំ២០២០,និងក្នុងស្មារតីសាមគ្គីភាពជាតិ និងការចែករំលែកបន្ទុកដ៏ធ្ងន់របស់ជាតិដើម្បីប្រយុទ្ធប្រឆាំងនឹងជំងឺកូវីដ-១៩ ដ៏កាចសាហាវនេះ ទើបក្រសួងសេដ្ឋកិច្ច និងហិរញ្ញវត្ថុ ធ្វើការណែនាំដល់ក្រសួង ស្ថាប័ន ,គ្រឹះស្ថានសាធារណៈរដ្ឋបាលមន្ទីរជំនាញរាជធានី ខេត្ត និងរដ្ឋបាលរាជធានី ខេត្ត ធ្វើវិចារណកម្ម និងពង្រឹងប្រសិទ្ធភាពចំណាយលើកទី២ ដោយកាត់សន្សំចំណាយបន្ថែមឱ្យគ្រប់៥០% សម្រាប់ការអនុវត្តចំណាយថវិកាឆ្នាំ២០២០ តាមការកំណត់ ឱ្យមានប្រសិទ្ធភាពចាប់ពីពេលនេះតទៅ៕ សេង ណារិទ្ធ
