(ខេត្តកែប)៖ លោក កែន សត្ថា អភិបាល នៃគណៈអភិបាលខេត្តកែប បាននិងកំពុងប្រតិកម្មរឿងអ្នកធ្វើរបងបេតុងដ៏រឹងមាំចំនួនបីខ្សែ ដែលមានម្ចាស់ផ្សេងៗគ្នានិងជីកព្រំដីនិងចាក់ដីរំលោភយកដីសហគមន៍នៅចំណុចអ៊ូកញ្ឆែត ស្ថិតក្នុងភូមិអង្គោល ឃុំអង្គោល ស្រុកដំណាក់ចង្អើរ ខេត្តកែប។
ការប្រតិកម្មបែបនេះ ខណៈលោក កែន សត្ថា បានឃើញរូបភាពមួយរបស់កាសែតក្នុងស្រុកនិងទូរទស្សន៍បានចាក់ផ្សាយនិងមន្ត្រីសាលាខេត្តមួយរូបបានបង្ហាញរូបភាពនិងទីតាំងនៅចំណុចដែលត្រូវបានគេហ៊ុពទ្ធ័យកដីសហគមន៍កាលពីថ្ងៃទី១៤ ខែមេសា ឆ្នាំ២០២០។
ពាក់ព័ន្ធនឹងការធ្វើរបងហ៊ុព័ទ្ធដីសហគមន៍ខាងលើ លោក កែន សត្ថា អភិបាលខេត្តកែប ក៏បានទូរស័ព្ទដោយនិយាយខ្លាំងៗប្រាប់ទៅ លោកស្រី គឹម ចន្នី អភិបាលស្រុកដំណាក់ចង្អើរ ដោយតម្រូវឱ្យលោកស្រី និងមន្ត្រីជំនាញចុះពិនិត្យឡើងវិញរឿងអ្នកធ្វើរបងបេតុងរំលោភយកដីសហគមន៍ ហលយលោកថែមទាំងជំរុញដល់លោកស្រីអភិបាលស្រុកឱ្យផ្ញើរបាយការណ៍ជាបន្ទាន់មួយមកឱ្យខេត្តវិញពាក់ពន្ធ័រឿងអ្នកបំពានច្បាប់យកដីរដ្ឋបំណងយកជាកម្មសិទ្ធិ។
ជុំវិញករណីនេះដែរ លោក កែន សត្ថា អភិបាលខេត្តកែប បានប្រាប់កម្ពុជាថ្មី នៅរសៀលថ្ងៃដដែលថា អ្នកធ្វើសំណង់រំលោភយកដីរដ្ឋក៍ជាដីសហគមន៍ត្រូវតែដាក់ផែនការវាយកម្ទេចចោលព្រោះវាជារឿងអាក្រក់មួយមិនអាចអត់ឱនបានឡើយ។
ដោយឡែក លោក ព្រុំ គន្ធិ អភិបាលរងខេត្តកែបទទួលបន្ទុកដំណោះស្រាយដីរដ្ឋថ្នាក់ខេត្ត បានមានប្រសាសន៍ដោយមិនបានព្រៀងទុកថា នេះមកពីមន្ត្រីថ្នាក់ក្រោមមិនបានរាយការណ៍មកខេត្តទើបមានអ្នកធ្វើបំពានយកដីសហគមន៍បែបនេះ។
ស្របគ្នានឹងរឿងរ៉ាវខាងលើ លោក វ៉ៅ សុខាប្រធានមន្ទីររៀបចំដែនដីនរគរូបនីយកម្ម សំណង់និងសុរិយោដីខេត្តកែប បាននិយាយប្រាប់ឱ្យដឹងដែរថា អ្នកធ្វើរបងទាំងនោះបើតាមដឹងមាននាក់រត់ការឱ្យមន្ទីរចេញប្លង់កម្មសិទ្ធិដែរ ប៉ុន្តែលោកបានបដិសេធមិនយល់ព្រមចេញប្លង់ឱ្យអ្នករំលោភយកដីសហគមន៍នោះឡើយ។
ទោះជាបែបណាគេបានប្រទះឃើញជាញឹកញាប់លោក សយ ចន្ធ័រ៉ាវុធ ប្រធានការរិយាល័យរៀបចំដែនដីស្រុកដំណាក់ចង្អើរនិងមន្ត្រីផ្សេងៗទៀតចុះទៅធ្វើការវាស់វែងដីដែលឧស្សាហ៍មានទំនាស់គ្នានៅជាប់ឆ្នេរសមុទ្រអង្គោលជាច្រើនដងរាប់ទាំងដីសហគមន៍ផងដែរ។រីឯមន្ត្រីជលផលក៍ធ្លាប់និយាយរៀបរាប់រឿងដីសហគមន័នោះដែរដោយមន្ត្រីជលផលរូបនោះនិយាយថាការធ្វើរបងនិងចាក់ដីលប់យកដីសហគមន៍ទាល់តែដេកចងមុងចាំទើបបាន បើមិនដូច្នេះទេនៅតែគេលួចធ្វើសកម្មភាពបានតែដដែល៕ សេង ណារិទ្ធ
