(ខេត្តកំពត)៖ លោក បណ្ឌិតប៉ែន ស៊ីម៉ន ប្រធានគណៈកម្មការទី១០នៃរដ្ឋសភានិងជា អ្នកតំណាងរាស្ត្រ មណ្ឌលកំពត បានជំរុញដល់ ថ្នាក់ដឹកនាំខេត្តនិងមន្ទីរ អង្គភាពពាក់ព័ន្ធទាំងអស់ក្នុងខេត្តកំពត ត្រូវសហការយកចិត្តទុកដាក់ ធ្វើការពិនិត្យ និងតាមដានសុខភាពរបស់ប្រជាពលរដ្ឋខ្មែរ ដែលទើបត្រឡប់មកពីធ្វើការនៅប្រទេសថៃឱ្យបានល្អ ដើម្បីធានាបាននូវការទប់ស្តាត់ ការនាំចូលជំងឺកូវីដ១៩ ពីខាងក្រៅមកចម្លងរាលដាលនៅក្នុងសហគមន៍។
ស្របពេលដែលពិភពលោក ពិសេសប្រទេសថៃ ដែលកំពុងជួបវិបត្តិនៃការឆ្លងរាតត្បាតនៃកូវីដ១៩កាន់តែធ្ងន់ធ្ងរ ប្រមុខរាជរដ្ឋាភិបាលកម្ពុជា មានការព្រួយបារម្ភអំពីសុខទុក្ខប្រជាពលរដ្ឋខ្លួនដែលបានធ្វើចំណាកស្រុកទៅធ្វើការនៅប្រទេសថៃយ៉ាងខ្លាំង។ ដោយសារវិបត្តិជាសកល ជម្ងឺឆ្លងកូវីដ១៩នេះ ស្របពលដែលពលរដ្ឋខ្មែរជាច្រើនពាន់នាក់អាចនឹងត្រឡប់មកកម្ពុជាវិញជាបន្តបន្ទាប់ ផងដែរ។
ដូច្នេះដើម្បីសម្រួលដល់ការលំបាក និងដើម្បីទប់ស្កាត់ការ នាំចូលជំងឹកូវីដ១៩ ពីខាងក្រៅប្រទេស រាជរដ្ឋាភិបាលកម្ពុជាយើងបានដាក់ចេញវិធានការណែនាំយ៉ាងហ្មត់ចត់ និងបានបញ្ជូនមន្ត្រី និងរថយន្តជាច្រើនរយគ្រឿងសម្រាប់ដឹកជញ្ជូនពលរដ្ឋខ្មែរ មកស្រុកកំណើតវិញ។
ពាក់ព័ន្ធបញ្ហាខាងលើនេះដែរ នៅរសៀលថ្ងៃទី ១០ ខែមេសា ឆ្នាំ២០២០ លោក បណ្ឌិត ប៉ែន ស៊ីម៉ន ដោយមានការចូលរួមអមដំណើរពីសំណាក់ លោក ជាវ តាយ អភិបាលខេត្ត លោក ជឹង ផល្លាប្រធានក្រុមប្រឹក្សាខេត្ត រួមនិងថ្នាក់ដឹកនាំខេត្ត ព្រមទាំងមន្ត្រីពាក់ព័ន្ធបាន អញ្ជើញចុះពិនិត្យបន្ទប់ដែលបានរៀបចំត្រៀមសម្រាប់អ្នកជំងឺកូវីដ១៩ នៅអគារសាលារៀនចំនួនពីរ គឺនៅវិទ្យាល័យព្រះរាជសម្ភារ និងសាលា គរុកុសលនិងវិក្រិត្យការខេត្តកំពត និងផ្ទះសំណាក់សំណាងលាភ ដែលរដ្ឋបាលខេត្តកំពត បានត្រៀមលក្ខណៈទុករួចជាស្រេច។
ក្នុងឱកាសនោះ លោក បណ្ឌិតប៉ែន ស៊ីម៉ន បានកោតសរសើរ ដល់រដ្ឋបាលខេត្ត ក៏ដូចជាថ្នាក់ដឹកនាំនិងមន្ទីរអង្គភាព ពាក់ព័ន្ធក្នុងខេត្ត ដែលបានយកចិត្តទុកដាក់អនុវត្តតាមអនុសាសន៍ណែនាំរបស់ប្រមុខរាជរដ្ឋាភិបាល សម្ដេចតេជោហ៊ុន សែន ក្នុងការត្រៀមបន្ទប់ ឱ្យបានសមស្រប ក្នុងករណីមានការផ្ទុះឡើងនូវជំងឺឆ្លងកូវីដ១៩នៅក្នុងខេត្ត្ណកំពតនេះ។
លោកបណ្ឌិតប៉ែនស៊ីម៉ន ក៏បានក្រើនរំលឹកជំរុញណែនាំដល់ថ្នាក់ដឹកនាំខេត្ត ក៏ដូចជាមន្ទីរសុខាភិបាលខេត្ត នៅពេលដែល ពលរដ្ឋបានវិលត្រឡប់មកពីប្រទេសថៃវិញ ក្នុងពេលណាមួយក៏ដោយ ត្រូវតែមានការយកចិត្តទុកដាក់ត្រួតពិនិត្យសុខភាព និងទំនុកបំរុងស្បៀងអាហារ ជូនពួកគាត់ឱ្យបានល្អ ហើយបើក្នុងករណីពិនិត្យទៅឃើញមានការសង្ស័យនូវការឆ្លងជំងឺកូវីដ១៩នោះ សូមធ្វើការណែនាំ និងដាក់គាត់ឱ្យសម្រាកនៅបន្ទប់ត្រៀមសិន ដើម្បីបន្តការតាមដានពិនិត្យ និងព្យាបាល ឱ្យបានជាសះស្បើយ ទើបអនុញ្ញាតឱ្យពួកគាត់វិលត្រឡប់ទៅផ្ទះសម្បែង។ ចំណែកឯប្រជាពលរដ្ឋ ជាពលរដ្ឋណាត្រួតពិនិត្យហើយ ពុំរកឃើញមានការសង្ស័យ ក៏ត្រូវតែអប់រំណែនាំឱ្យពួកគាត់រស់នៅដាច់ដោយឡែករយៈពេល១៤ថ្ងៃសិនដែរ ពេលទៅដល់ផ្ទះសំបែង ហើយសូមកុំប្រញាប់រស់នៅស្និទ្ធស្នាលជាមួយសមាជិកគ្រួសារ។
សូមបញ្ជាក់ថា រដ្ឋបាលខេត្តកំពតបានរៀបចំបន្ទប់នៅក្នុងខេត្តចំនួន ៣កន្លែងនិងមន្ទីរពេទ្យបង្អែកស្រុកចំនួន៥ទៀតមានប្រមាណចំនួន២៥៤បន្ទប់ដើម្បីត្រៀមសម្រាប់ទុកព្យាបាល អ្នកឆ្លងជំងឺកូវីដ១៩៕ សេង ណារិទ្ធ
