(ខេត្តកំពត)៖ នៅព្រឹកថ្ងៃទី១០ ខែមេសាឆ្នាំ២០២០ រដ្ឋបាលខេត្តកំពត បានបន្តប្រគល់អំណោយចែកជូនដល់រដ្ឋបាលក្រុង ស្រុកទាំង ៨ ក្នុងខេត្ត ជាលើកទី២ ដើម្បីយកទៅចែកជូនដល់ប្រជាពលរដ្ឋ និងបម្រើដល់សកម្មភាពក្នុងការប្រយុទ្ធបង្ការទប់ស្កាត់ជំងឺកូវីដ១៩នៅមូលដ្ឋានក្នុងខេត្តក្នុងប្រតិបត្តិការឲ្យបានកាន់តែសកម្មខ្លាំងក្លាថែមទៀត។
ក្នុងឱកាសនោះ លោក ជាវ តាយ អភិបាលខេត្ត បានមានប្រសាសន៍ថា អំណោយ ដែលបានផ្ដល់ជូនដល់រដ្ឋបាលក្រុង ស្រុកសម្រាប់យកទៅប្រតិបត្តិការក្នុងសកម្មភាពប្រយុទ្ធនឹងជំងឺកូវីដ១៩ ពេលនេះ គឺជាការផ្ដល់ជូនលើកទី២ ដោយអំណោយទាំងនេះក៏មានការចូលរួមជាមួយរដ្ឋបាលខេត្ត ពីសប្បុរសជននានាផងដែរ។
ជាមួយនេះ លោកអភិបាលខេត្ត ក៏បានផ្ដាំផ្ញើ ដល់អាជ្ញាធរក្រុងស្រុក ត្រូវយកអំណោយទាំងនេះ បន្តចែកជូនដល់ប្រជាពលរដ្ឋនិងអាជ្ញាធរមូលដ្ឋាន ឃុំ សង្កាត់របស់ខ្លួន ក្នុងគោលដៅដើម្បីធ្វើយ៉ាងណារួមគ្នាទប់ស្កាត់ការឆ្លងជំងឺដ៏កាចសាហាវនេះឱ្យមានប្រសិទ្ធភាពខ្ពស់។ ពិសេសត្រូវចូលរួមសហការអនុវត្តនូវរាល់បទបញ្ជារបស់ប្រមុខរាជរដ្ឋាភិបាល ក្រសួងមហាផ្ទៃ និងរដ្ឋបាលខេត្ត ដើម្បីខេត្តកំពតរួចផុតពីការឆ្លង ជំងឺកូវីដ១៩ ទាំងអស់គ្នា។
អំណោយដែលចែកជូន ស្រុក ក្រុងទាំង៨ រួមមាន៖ ១-អង្គរចំនួន៨,៧០០គីឡូក្រាម ចែកជូនពលករទើបត្រលប់មកពីបរទេស ចំនួន៤៣៥នាក់ ដោយម្នាក់ៗ ២០គីឡូក្រាម។
២-ម៉ាស់ចំនួន១៦០ប្រអប់ស្មើនឹង៨,០០០ម៉ាស់ ដោយមួយក្រុងស្រុកទទួលបាន១,០០០ម៉ាស់។
៣-ជែលអាកុលលាងដៃ ចំនួន១២០ដប ដោយមួយក្រុងស្រុកទទួលបាន ១៥ដប៕ សេង ណារិទ្ធ
