(ខេត្តកំពត)៖ នៅរសៀលថ្ងៃទី០៣ ខែមេសា ឆ្នាំ២០២០ លោក សេង សិរីបុត្រ អភិបាលរងខេត្ត បានដឹកនាំកិច្ចប្រជុំពិភាក្សាក្រុមការងារ ថ្នាក់ ខេត្ត ដើម្បីបែង ចែក ការងារ អ្នក ទទួល ខុស ត្រូវ ពលរដ្ឋខ្មែរដែលវិលត្រលប់មកពីប្រទេសថៃ ដោយមាន សមាសភាព ចូលរួម ពី លោកស្នងការរងនគរបាលខេត្ត លោកមេបញ្ជាការរងតំបន់ប្រតិបត្តការសឹករងខេត្ត មេបញ្ជាការរងកងរាជអាវុធហត្ថខេត្ត អភិបាលក្រុង ស្រុក ប្រធាន អនុប្រធានមន្ទីរពាក់ព័ន្ធ សរុបចំនួន ៣៦ នាក់។
កិច្ចពិភាក្សា បានដាក់នូវវិធានការមួយចំនួន ក្នុងនោះសូមឱ្យបណ្ដាថ្នាក់ដឹកនាំ មន្ទីរអង្គភាពអាជ្ញាធរ ក្រុង ស្រុក ដែលជាក្រុមការងារត្រូវតែចូលរួមយកចិត្តទុកដាក់សហការគ្នា ក្នុងការដឹកជញ្ជូនពលរដ្ឋខ្មែរទាំងអស់នោះដែលមកពីប្រទេសថៃ ដោយទទួលខុសត្រូវខ្ពស់ទាំងសុវត្ថិភាព សុខភាព ទ្រព្យសម្បត្តិ និងរក្សាឲ្យបាននូវសណ្ដាប់ធ្នាប់ និងរបៀបរៀបរយសាធារណៈក៏ដូចជាជីវភាពរស់នៅខ្វះខាតសម្រាប់ពលរដ្ឋទាំងអស់នោះពេលមកកាន់មូលដ្ឋានរៀងៗខ្លួន។
ជាមួយគ្នានេះ លោក សេង សិរីបុត្រ អភិបាលរងខេត្ត បានជំរុញដល់ក្រុមការងារទាំងអស់ ត្រូវសហការអនុវត្តនូវកិច្ចការខាងលើនេះឱ្យទទួលបានប្រសិទ្ធភាពខ្ពស់ ដើម្បីបង្កាទប់ស្កាត់ កុំឱ្យមានការរីករាលដាលជំងឺ កូវីដ ១៩ ដែលជាជំងឺឆ្លងដ៏សាហាវនេះ៕ សេង ណារិទ្ធ
