ករណីឆបោកប្រាក់តាមវីង កើតឡើងកាលពីថ្ងៃទី៣០ ខែតុលា ឆ្នាំ២០២៣ នៅចំណុចភូមិបង្អែក ឃុំស្វាយភ្លោះ ស្រុកពាមជរ ខេត្តព្រៃវែង ។
មន្ត្រីកងរាជអាវុធហត្ថខេត្តព្រៃវែង បានអោយដឹងថា មានជនសង្ស័យមិនស្គាល់អត្តសញ្ញាណ បានលួចចូលហ្វេសប៊ុកឈ្មោះ SAVY HUN រស់នៅភូមិមានជ័យ ឃុំកោះចេក ស្រុកពាមជរ ខេត្តព្រៃវែង ហើយបានឆាតមកម្ចាស់ហ្វេសប៊ុកឈ្មោះ Khut Vibol រស់នៅភូមិបង្អែក ឃុំស្វាយភ្លោះ ស្រុកពាមជរ ខេត្តព្រៃវែង ដើម្បីឲ្យផ្ញើលុយចំនួន ៣៩,០០០,០០០រៀល។ ដោយសារម្ចាស់ហ្វេសបុកទាំងពីរ ជាមនុស្សស្គាល់គ្នាផង ហើយរកស៊ីផ្ញើលុយជាមួយគ្នាទៅវិញទៅមក ក៏បានផ្ញើឲ្យជនសង្ស័យ។ ក្រោយមកទើបដឹងថា ហ្វេសប៊ុករបស់ឈ្មោះ SAVY HUN ត្រូវបានចោរលួចចូល ដើម្បីឆាតឆបោកប្រាក់ ។
មន្ត្រីកងរាជអាវុធហត្ថខេត្តព្រៃវែង បានបន្តថា ក្រោយពីបានទទួលពាក្យបណ្តឹងពីជនរងគ្រោះ លោកឧត្តមសេនីយ៍ត្រី ឈួន គឹមសាន មេបញ្ជាការកងរាជអាវុធហត្ថខេត្តព្រៃវែង បានបញ្ជាឱ្យកម្លាំងជំនាញ ធ្វើសហការ ជាមួយក្រុមហ៊ុនវីង ដើម្បីឆែកទីតាំងដកលុយ ជាលទ្ធឃើញថា ការដកលុយនេះ គឺដកនៅក្នុងភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ ។
បន្ទាប់មកកម្លាំងកងរាជអាវុធហត្ថខេត្ដព្រៃវែង ធ្វើការសហការជាមួយអាវុធហត្ថខេត្តព្រះសីហនុ ឈានដល់ការឃាត់ខ្លួនជនសង្ស័យចំនួន ២នាក់ រួមមាន ៖
ទី១-ឈ្មោះ អាន ដានិត ភេទស្រី អាយុ២៨ឆ្នាំ មុខរបរលក់អនឡាញ រស់នៅភូមិចំណោទរាម ឃុំបិតប្រាំង ស្រុកព្រៃនប់ ខេត្តព្រះសីហនុ
និងទី២-ឈ្មោះ នី ចិត្រា ភេទប្រុស អាយុ៣៦ឆ្នាំ មុខរបរជាងសំណង់ រស់នៅភូមិចំណោទរាម ឃុំបិតប្រាំង ស្រុកព្រៃនប់ ខេតព្រះសីហនុ ។
សម្ភារចាប់យក រួមមាន ៖
-ម៉ូតូ២គ្រឿង
-អត្តសញ្ញាណបណ្ណ័សញ្ជាតិខ្មែរ ច្បាប់ដើម២សន្លឹក
-សំបុត្រកំណើត១ច្បាប់ សំបុត្របញ្ជាក់កំណើត២ច្បាប់ និងឯកសារមួយចំនួន
-កាតធនាគារ៥
-បណ្ណ័សម្គាល់យានយន្តច្បាប់ដើម១
-ប័ណ្ណបើកបរចំនួន១
-ប័ណ្ណចាក់វ៉ាក់សាំងកូវីដ-១៩ ចំនួន២
-លោហធាតុពណ៌លឿង ចំនួន១ខ្សែ និងបន្តោងរូបសត្វចំនួន១
-ស៊ីមកាតចំនួន២១ស៊ីម
-កាបូបដៃ១
-កាបូបយួរដៃ១
-សោររថយន្ត១
ស្លាកលេខម៉ូតូ ព្រះសីហនុ1J 8234
-ទូរសព្ទចំនួន៩គ្រឿង
និង-ប្រាក់ដុល្លារ ១,៤០០$ និងប្រាក់រៀល ៣,៩០៣,០០០រៀល ។
មន្ត្រីកងរាជអាវុធហត្ថខេត្តព្រៃវែង បន្តទៀតថា បន្ទាប់ពីធ្វើការស្តាប់ចម្លើយជនសង្ស័យទាំងពីរនាក់ និងសហការជាមួយក្រុមហ៊ុនវីង ឆែកមើលកាមេរ៉ា ឃើញមានការដកលុយនៅចំណុចផ្ទះវីង ឈ្មោះផល្លែន នៅភូមិពន្លៃ ឃុំភ្នំដី ស្រុកភ្នំស្រុក ខេត្តបន្ទាយមានជ័យ ហើយកម្លាំងស្នើសុំគោលការពន្លាតដែនដី ទៅសហការជាមួយកងរាជអាវុធហត្ថខេត្តបន្ទាយមានជ័យ ដើម្បីស្រាវជ្រាវបន្ត ។
ក្រោយពីបានសហការជាមួយកម្លាំងកងរាជអាវុធហត្ថខេត្តបន្ទាយមានជ័យរួចមក កម្លាំងរាជអាវុធហត្ថខេត្តព្រៃវែង បានឃាត់ខ្លួនជនសង្ស័យបាន០១នាក់ទៀត ទី៣-ឈ្មោះ អ៊ាម គិមរាស ភេទស្រី អាយុ២៩ឆ្នាំ មុខរបរលក់ដូរ រស់នៅភូមិពន្លៃ ឃុំភ្នំដី ស្រុកភ្នំស្រុក ខេតបន្ទាយមានជ័យ ។
វត្ថុតាងចាប់យករួមមាន ៖
-ទូរសព្ទដៃចំនួន ០១គ្រឿង
-អត្ដសញ្ញាណប័ណ្ណចំនួន ០១
និង-ប្រាក់រៀល ចំនួន ១,៨០០,០០០រៀល ។
បច្ចុប្បន្នជនសង្ស័យទាំង០៣នាក់ និងវត្ថុតាង ត្រូវបានមន្ត្រីជំនាញកងរាជអាវុធហត្ថខេត្តព្រៃវែង ចាត់ការបន្តតាមនីតិវិធី ៕
