កំពង់ធំ ៖ ដោយមានកិច្ចសហការរវាងមន្ទីរកសិកម្ម រុក្ខាប្រម៉ាញ់និងនេសាទនិងមន្ទីរបរិស្ថានក្រោមការណែនាំរបស់រដ្ឋបាលខេត្តកំពង់ធំ នៅព្រឹកថ្ងៃទី២២ ខែវិច្ឆិកា ឆ្នាំ២០២០ កូនឈើប្រណិតនិងកូនឈើផ្សេងៗទៀតប្រមាណ២៥៧០០ដើមបានយកទៅដាំឡើងវិញនៅតំបន់សហគមន៍ព្រៃឈើស្រែក្រសាំង ស្ថិតនៅក្នុងឃុំពពក ស្រុកស្ទោង ខេត្តកំពង់ធំ ក្រោមវត្តមានឯកឧត្តម សុខ លូ អភិបាលខេត្តកំពង់ធំ និងមានការអញ្ជើញពីមន្ត្រីរាជការ កងកម្លាំង សិស្សានុសិស្ស និងប្រជាពលរដ្ឋយ៉ាងច្រើន ។
ឯកឧត្តម សុខ លូ បានលើកថាប្រពៃណីដាំកូនឈើជាស្នាព្រះហស្តដែលបានបន្សល់ទុកដោយសម្តេចព្រះបរមរតនកោដ្ឋព្រះបាទនរោត្តម សីហនុ ដែលឲ្យឈ្មោះថា រុក្ខទិវា ហើយពិធីនេះត្រូវបានក្រសួងកសិកម្មរុក្ខាប្រម៉ាញ់ និងនេសាទកំណត់យ៉ាងជាក់លាក់ដើម្បីប្រារព្ធពិធីដាំកូនឈើនេះជារៀងរាល់ឆ្នាំទូទាំងប្រទេស។ ដោយឡែកគោលបំណងសំខាន់នៃការដាំដុះនេះគឺដើម្បីស្តារព្រៃឈើដែលបានបាត់បង់ឡើងវិញសម្រាប់ជាប្រភពទឹកសាបប្រើប្រាស់ព្រោះព្រៃឈើមានសារៈសំខាន់ និងផលប្រយោជន៍ខ្លាំងណាស់ចំពោះមនុស្ស សត្វ បរិស្ថាន ។
ឯកឧត្តមបានលើកឡើងថា ព្រៃឈើមិនត្រឹមតែជួយដល់មនុស្សសត្វនិងបរិស្ថានប៉ុណ្ណោះទេ ប៉ុន្តែព្រៃឈើជារបាំងខ្យល់ទប់ស្កាត់ការសឹករេចរឹល ព្រៃឈើការពារនូវការហូរច្រោះទប់ស្កាត់ការបាក់ស្រុតផ្សេងៗ ការពារគ្រោះធម្មជាតិ ខ្យល់ព្យុះ គ្រោះរាំងស្ងួតជាដើម និងផ្តល់នូវសោភ័ណភាព ទាក់ទាញនូវភ្ញៀវទេសចរជាតិនិងអន្តរជាតិឲ្យចូលមកទស្សនាកាន់តែច្រើនៗឡើង ដែលជាប្រភពចំណូលដ៏សំខាន់ដល់ប្រជាសហគមន៍និងជាតិទាំងមូល៕
ការដាំកូនឈើពិតជាមានអត្ថន័យដ៏ជ្រាលជ្រៅសម្រាប់ចលនាបំផុសស្មារតីប្រជាពលរដ្ឋយើងឲ្យចេះស្រឡាញ់ព្រៃឈើ ចូលរួមក្នុងការដាំដុះ និងការពារ ព្រៃឈើ ក៏ដូចជាការជួយផ្ដល់ផលប្រយោជន៍ឲ្យប្រជាពលរដ្ឋក្នុងការរស់នៅប្រចាំថ្ងៃ ដើម្បីបង្កបង្កើនផលកសិកម្មបង្កើនសុខុមាលភាពគ្រួសារ ព្រមទាំងជួយលើកស្ទួយបរិស្ថានសង្គមផងដែរ ។
ឯកឧត្តមបន្តថាការដាំកូនឈើ គឺជាការឆ្លុះបញ្ចាំងឲ្យឃើញនូវការខិតខំប្រឹងប្រែងយ៉ាងសកម្មរបស់យើងទាំងអស់គ្នា ក្នុងការស្តារគម្របព្រៃឈើឡើងវិញឲ្យមានពណ៌បៃតងនិងដើម្បីរក្សាបាននូវការប្រែប្រួលអាកាសធាតុ ដែលជាបញ្ហាប្រឈម និងជាកង្វល់រួមដ៏ធំមួយរបស់ពិភពលោក ដោយសារតែបណ្ដាប្រទេសជឿនលឿនជាច្រើន បានបញ្ចេញឧស្ម័នពុល ឧស្ម័ន ផ្ទះកញ្ចក់យ៉ាងច្រើនសន្ធឹកសន្ធាប់ ក្នុងនោះកម្ពុជា និងបណ្ដាប្រទេសកំពុងអភិវឌ្ឍន៍ដទៃទៀត បាននិងកំពុងរងគ្រោះយ៉ាងខ្លាំង និងបានធ្វើឲ្យកំដៅនៅលើផែនដីកើនឡើង។
ម្យ៉ាងទៀត ការដាំដើមឈើ បានដើរតួនាទីយ៉ាងសំខាន់ក្នុងការជួយថែរក្សាដំណើរការប្រព័ន្ធអេកូឡូស៊ី តាមរយៈការជួយធ្វើនិយ័តកម្មអាកាសធាតុជួយកាត់បន្ថយឥទ្ធិពលអវិជ្ជមាន នៃការប្រែប្រួលអាកាសធាតុ ដូចជាទឹកជំនន់ ខ្យល់ព្យុះ និងការស្រូបយកឧស្ម័នកាបូនិចពីបរិយាកាស។
ក្នុងឱកាសនោះឯកឧត្តមក៏បានអំពាវនាវដល់ប្រជាកសិករទាំងអស់ត្រូវចូលរួមថែរក្សាការពារព្រៃឈើនិងបរិស្ថានធម្មជាតិឲ្យបានគ្រប់ៗគ្នាដើម្បីជាប្រយោជន៍ដល់ការរស់នៅរបស់ខ្លួនផង សហគមន៍ផង និងជីវិតសត្វព្រៃគ្រប់ប្រភេទ ព្រមទាំងប្រព័ន្ធជីវៈចម្រុះផងដែរ ជាពិសេសកាត់បន្ថយនូវគ្រោះធម្មជាតិដូចជា ខ្យល់ព្យុះ ទឹកជំនន់ គ្រោះរាំងស្ងួតជាដើម។
តាមរបាយការណ៍របស់លោក ប៉ែន វណ្ណរិទ្ធ ប្រធានមន្ទីរកសហគមន៍ព្រៃឈើកសិកម្ម រុក្ខាប្រម៉ាញ់និងនេសាទខេត្តកំពង់ធំបានឲ្យដឹងថាសហគមន៍ព្រៃឈើក្នុងខេត្តមាន៨៣ សគមន៍ហើយកូនឈើទាំងអស់នេះយកទៅដាំក្នុងផ្ទៃដី៤០ហិចតា លើផ្ទៃដីទាំងមូល១២៦១.៥ហិចតា ៕
