(ខេត្តកំពត)៖ លោកប្រធានក្រុមប្រឹក្សាខេត្តកំពតមានប្រសាសន៍ដោយណឺនាំដល់ប្រជាពលរដ្ឋក្នុងមូលដ្ឋានត្រូវចេះរក្សាអនាម័យ ពិសេសខិតខំបង្កបង្កើនផលដាំដំណាំរួមផ្សំកុំទុកដីឲ្យនៅទំនេរ ដើម្បីជួយសម្រួលជីវភាពប្រចាំថ្ងៃឲ្យបានកាន់តែប្រសើរ។
នេះជាកាផ្តាំផ្ញើ របស់លោក ជឹង ផល្លាប្រធានក្រុមប្រឹក្សាខេត្ត ក្នុងឱកាសចុះសួរសុខទុក្ខ និងចែកស្បៀងអាហារ ជាគ្រឿងឧបភោគ បរិភោគ ជូនប្រជាពលរដ្ឋដែលកំពុងខ្វះខាតចំនួន២៧គ្រួសារ នៅភូមិដាសស្គរ ឃុំបឹងសាលាខាងជើង ស្រុកកំពង់ត្រាច ខេត្តកំពត កាលពីព្រឹកថ្ងៃទី២១ខែកក្កដា ឆ្នាំ២០២០។ដោយពិធីនោះ ក៏មានការចូលរួមអមដំណើរពី លោក ភុន សារពេជ្រ ប្រធានសម្ព័ន្ធយុវជនគណបក្សប្រជាជនកម្ពុជាខេត្តកំពត និងលោក ប៉ាង ណាត ប្រធានក្រុមការងារចុះមូលដ្ឋានស្រុកកំពង់ត្រាច ព្រមទាំងអស់លោកជាសមាជិកក្រុមប្រឹក្សាខេត្ត អភិបាលរងស្រុក កម្លាំងសមត្ថកិច្ចទាំងបី និងអាជ្ញាធរមូលដ្ឋាន។
លោក ជឹង ផល្លា បានលើកឡើងទៀតថា តាំងពីដើមរៀងមកនិងបច្ចុប្បន្នបើទោះបីកម្ពុជាទាំងមូល ក៏ដូចជាខេត្តកែប កំពុងស្ថិតនៅក្នុងស្ថានភាពនៃការប្រយុទ្ធប្រឆាំងជំងឺកូវីដ១៩ក្តី ថ្នាក់ដឹកនាំខេត្តគ្រប់លំដាប់ថ្នាក់ នៅតែបន្តយកចិត្តទុក្ខដាក់ជាប់ជានិច្ចដល់ប្រជាពលរដ្ឋដែលជួបបញ្ហាខ្វះខាតក្នុងជីវភាព។
ជាមួយគ្នានេះ ប្រធានក្រុមប្រឹក្សាខេត្ត ក៏បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចកាលសម្តេច តែងតែគិតគូរជានិច្ច ពីសុខទុក្ខ សុខភាព និងជីវភាពរស់នៅរបស់បងប្អូនប្រជាពលរដ្ឋ ដោយមិនប្រកាន់និន្នាការនយោបាយ ជំនឿ សាសនា ពណ៌សម្បុរនោះឡើយ។ ជាងនេះទៅទៀត ប្រមុខរាជរដ្ឋាភិបាលក៏បាននឹងកំពុងរៀបចំផែនការ ដើម្បីជួយសង្គ្រោះស្ថានភាព គ្រួសារក្រីក្រនៅទូទាំងប្រទេសជាជំហ៊ានៗផងដែរ។
លោកបានបញ្ជាក់ផងដែរថា ទោះជាយ៉ាងណាក្តី ក្នុងនាមជាប្រធាក្រុមប្រឹក្សាខេត្ត លោកសូមលើកទឹកចិត្ត និងជំរុញដល់ពលរដ្ឋទាំងអស់ ត្រូវគិតគូររឿងសុខភាពជាសំខាន់ និងត្រូវបន្តអនុវត្តវិធានការនានា ដើម្បីការពារខ្លួនពីជំងឺកូវីដ១៩។ ទន្ទឹមគ្នានេះ ស្របពេលរដូវវស្សាវចូលមកដល់ ភ្លៀងចាប់ផ្តើមធ្លាក់ ប្រជាពលរដ្ឋក៏ត្រូវខិតខំប្រឹងប្រែងប្រកបរបរដាំដុះ និងចិញ្ចឹមសត្វឲ្យបានច្រើន ព្រោះមានតែវិស័យកសិកម្មនេះទេ ដែលអាចជួយជ្រោមជ្រែងជីវភាពរបស់បងប្អូនប្រជាពលរដ្ឋបាន នៅក្នុងអំឡុងពេលនៃវិបត្តិសាកលនៃជំងឺកូវីដ១៩នេះ។
សូមជម្រាបផងដែរថា បើតាមការលើកឡើងរបស់ លោក ជួន សុភា អភិបាលរងស្រុកកំពង់ត្រាច បានឲ្យដឹងថា សម្ភារ: ស្បៀងអាហារ ជាគ្រឿងឧបភោគ បរិភោគ និងថវិកាទាំងនេះ គឺជាការឧបត្ថម្ភពីសំណាក់ លោក ជឹង ផល្លា ប្រធានក្រុុមប្រឹក្សាខេត្ត ដែលលោកបានគៀរគរសម្រាប់បន្តមកចែកជូនប្រជាពលរដ្ឋដែលកំពុងមានការខ្វះខាតក្នុងអំឡុងពេលការរាតត្បាតជំងឺកូវីដ ១៩ ហើយសម្ភារ: ស្បៀងអាហារដែលត្រូវចែកជូនប្រជាពលរដ្ឋ ទាំង២៧គ្រួសារ ដោយក្នុង១គ្រួសារ ទទួលបាន៖ អង្ករ ២៥គីឡូក្រាម មីម៉ាម៉ា១កេះ ត្រីខ១០កំប៉ុង ទឹកត្រី ៦ដប ទឹកសុទ្ធវីតាល់១កេះ និងថវិកាចំនួន២មុឺនរៀល។
បន្ទាប់មក ប្រធានក្រុមប្រឹក្សាខេត្ត និងសហការី ព្រមទាំងក្រុមការងារ ក៏បានបន្តដំណើរទៅពិនិត្យស្វែងយល់ការដាំដំណាំរួមផ្សំ និងពិនិត្យទីតាំងចញ្ចឹមមាន់របស់បងប្អូនប្រជាពលរដ្ឋក្នុងមូលដ្ឋាន ព្រមទាំងបន្តទៅប្រគល់ផ្ទះ២ខ្នងជូនប្រជាពលរដ្ឋស្ថិតក្នុងភូមិដាសស្គរ ឃុំបឹងសាលាខាងជើង ស្រុកកំពង់ត្រាច ខេត្តកំពត៕ សេង ណារិទ្ធ
