(ខេត្តកែប)៖ លោកប្រធានក្រុមប្រឹក្សាខេត្តកែបមានប្រសាសន៍លើកទឹកចិត្តពលរដ្ឋក្នុងមូលដ្ឋានដែលកំពុងមានការខ្វះខាត កុំឲ្យអស់សង្ឃឹម ត្រូវខិតខំបង្កបង្កើនផលដាំដំណាំរួមផ្សំ ដើម្បីជួយសម្រួលជីវភាពប្រចាំថ្ងៃឲ្យបានកាន់តែប្រសើរ និងត្រូវថែទាំសុខភាពឲ្យបានល្អ ពិសេសត្រូវចេះការពារខ្លួនពីជំងឺកូវិដ១៩ ហើយស្របពេលរដូវភ្លៀងចាប់ផ្តើមធ្លាក់ផងនោះ ពលរដ្ឋទាំងអស់ត្រូវខិតខំព្យាយាមពង្រឹងការងារដាំដុះកុំទុកដីឲ្យនៅទំនេរ។
នេះជាកាផ្តាំផ្ញើ របស់លោក សំ សារីន ប្រធានក្រុមប្រឹក្សាខេត្ត ក្នុងឱកាសចុះសួរសុខទុក្ខ និងចែកស្បៀងអាហារ ជាគ្រឿងឧបភោគ បរិភោគ ជូនប្រជាពលរដ្ឋងាយរងគ្រោះចំនួន៥០គ្រួសារ នៅភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប កាលពីព្រឹកថ្ងៃទី១៨ ខែកក្កដា ឆ្នាំ២០២០។ដោយពិធីនោះ ក៏មានការអញ្ជើញចូលរួមពីសំណាក់ លោក ងួន ប៊ៀន អ្នកតំណាងរាស្ត្រមណ្ឌលខេត្តកែប លោក ងួន ច័ន្ទសុជាតា សមាជិកគណៈកម្មាធិកាកណ្តាល និងជាប្រធានសហភាព សហព័ន្ទយុវជនកម្ពុជា(ស ស យ ក)ខេត្តកែប ព្រមទាំងអស់លោកជាសមាជិកក្រុមប្រឹក្សាខេត្ត អភិបាលរងខេត្ត យុវជន (ស ស យ ក) អភិបាល អភិបាលរងស្រុកដំណាក់ចង្អើរ និងអាជ្ញាធរមូលដ្ឋាន។
លោក សំ សារីន បានលើកឡើងទៀតថា តាំងពីដើមរៀងមកនិងបច្ចុប្បន្នបើទោះបីកម្ពុជាទាំងមូល ក៏ដូចជាខេត្តកែប កំពុងស្ថិតនៅក្នុងស្ថានភាពនៃការប្រយុទ្ធប្រឆាំងជំងឺកូវីដ១៩ក្តី ថ្នាក់ដឹកនាំខេត្តគ្រប់លំដាប់ថ្នាក់ នៅតែបន្តយកចិត្តទុក្ខដាក់ជាប់ជានិច្ចដល់ប្រជាពលរដ្ឋដែលជួបបញ្ហាខ្វះខាតក្នុងជីវភាព។ ជាមួយគ្នានេះ ប្រធានក្រុមប្រឹក្សាខេត្ត ក៏បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចកាលសម្តេច តែងតែគិតគូរជានិច្ច ពីសុខទុក្ខ សុខភាព និងជីវភាពរស់នៅរបស់បងប្អូនប្រជាពលរដ្ឋ ដោយមិនប្រកាន់និន្នាការនយោបាយ ជំនឿ សាសនា ពណ៌សម្បុរនោះឡើយ។ ជាងនេះទៅទៀត ប្រមុខរាជរដ្ឋាភិបាលក៏បាននឹងកំពុងរៀបចំផែនការ ដើម្បីជួយសង្គ្រោះស្ថានភាព គ្រួសារក្រីក្រនៅទូទាំងប្រទេសជាជំហ៊ានៗផងដែរ។ ដោយឡែកចំពោះប្រជាពលរដ្ឋក្រីក្រដែលមានជីវភាពខ្វះខាត(មានប័ណ្ណក្រីក្រ) តែពេលនេះពួកគាត់ មានជីវភាពប្រសើរឡើងវិញ គាប់ជួនពេលនេះប្រជាពលរដ្ឋខ្លះមានទីលំនៅសមរម្យ មានជីវភាពធូរធាទៅហើយ ដូច្នេះត្រូវតែសុំដកយកប័ណ្ណសធម៌មកនោះវិញ ព្រោះពេលនេះពលរដ្ឋខាងលើ លែងខ្វះខាតដូចមុនទៀតហើយ។
លោកបានបញ្ជាក់ផងដែរថា ទោះជាយ៉ាងណាក្តី ក្នុងនាមជាប្រធាក្រុមប្រឹក្សាខេត្ត លោកសូមលើកទឹកចិត្ត និងជំរុញដល់ពលរដ្ឋទាំងអស់ ត្រូវគិតគូររឿងសុខភាពជាសំខាន់ និងត្រូវបន្តអនុវត្តវិធានការនានា ដើម្បីការពារខ្លួនពីជំងឺកូវីដ១៩។ ទន្ទឹមគ្នានេះ ស្របពេលរដូវវស្សាវចូលមកដល់ ភ្លៀងចាប់ផ្តើមធ្លាក់ ប្រជាពលរដ្ឋក៏ត្រូវខិតខំប្រឹងប្រែងប្រកបរបរដាំដុះឲ្យបានកាន់តែប្រសើរជាងរាល់ឆ្នាំ ព្រោះមានតែវិស័យកសិកម្មទេ ដែលអាចជួយជ្រោមជ្រែងជីវភាពរបស់បងប្អូនប្រជាពលរដ្ឋបាន នៅក្នុងអំឡុងពេលនៃវិបត្តិសាកលនៃជំងឺកូវីដ១៩នេះ។
សូមជម្រាបផងដែរថា បើតាមប្រសាសន៍របស់ លោក ងួន ច័ន្ទសុជាតា បានឲ្យដឹងថា សម្ភារ: ស្បៀងអាហារ ជាគ្រឿងឧបភោគ បរិភោគ និងថវិកាទាំងនេះ គឺជាការឧបត្ថម្ភពីសំណាក់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដោយសម្តេចបានផ្តល់តាមរយៈ ឯកឧត្តម ហ៊ុន ម៉ានី ប្រធានសហភាព សហព័ន្ទកម្ពុជា(ស ស យ ក) ហើយបន្តផ្តល់ជូនមកសហភាព សហព័ន្ទកម្ពុជាគ្រប់បណ្តាខេត្ត នៅទូទាំងប្រទេស សម្រាប់បន្តទៅចែកជូនប្រជាពលរដ្ឋដែលកំពុងមានការខ្វះខាតក្នុងអំឡុងពេលការរាតត្បាតជំងឺកូវីដ ១៩ ហើយសម្ភារ: ស្បៀងអាហារដែលត្រូវចែកជូនប្រជាពលរដ្ឋ ទាំង៥០គ្រួសារ ដោយក្នុង១គ្រួសារ ទទួលបាន៖ អង្ករ ១៥គីឡូក្រាម មី១០កញ្ចប់ ត្រីខ៦កំប៉ុង ទឹកស៊ីអ៊ីវ ២ដប សាប៊ូ២ដុំ និងថវិកាមួយចំនួន។
បន្ទាប់មក គណៈអធិបតី និងសហការី ព្រមទាំងក្រុមការងារ ក៏បានបន្តដំណើរទៅសូរសុខទុក្ខ លោកមេភូមិអង្កោល ដែលមានជំងឺប្រចាំកាយកំពុងសម្រាកព្យាបាលនៅផ្ទះ ដោយបានឧបត្ថម្ភ នូវទឹកដោះគោឆៅចំនួន២ឡូ និងថវិកាចំនួន ២០០.០០០រៀល ព្រមទាំងបានឧបត្ថម្ភអង្ករដល់ជនពិការ១បាវផងដែរ៕ សេង ណារិទ្ធ
